Павел Амҷба: ахы ҳаҿалон ҳҿар еиқəхарц азы

© Foto / предоставлено Павел АмичбаПавел Амичба
Павел Амичба - Sputnik Аҧсны
Анапаҵаҩра
Аԥсны Аџьынџьтəылатə еибашьраҿы изныкымкəа аҧсра алакҭа иҭаҧшхьаз, аха зразҟы зыцныҟəаз, "Агəымшəаразы амедал" занашьоу Павел Камыгə-иԥа Амҷба игəалаиршəоит аибашьра амш инаркны Аиааира амҩахь инагаз аԥсҭазааратə мҩа дшанысыз.

Киевтəи иреиҳау арратə-мшынтə ҵараиурҭа аушьҭымҭа, Аҩадатәи афлот аррамаҵзура иахысхьоу, аофицар ичын занаршьахьоу, Аҧсны Аџьынџьтəылатə еибашьраҿы изныкымкəа аҧсра алакҭа иҭаҧшхьаз, аха зразҟы зыцныҟəаз, иахьа зыуаажəлар ирылагылоу, "Агəымшəаразы амедал" занашьоу Павел Камыгə-иҧа Амҷба игəалаиршəоит аибашьра амш инаркны Аиааира амҩахь инагаз аҧсҭазааратə мҩа дшанысыз.

Аибашьра

- Аибашьра ианалага амш инаркны зегьы излаҳалшоз ала аибашьра ҳалагеит, агəыҧқəа раҧҵара нап аҳаркит. Ус ишнеиуаз ахырҕəҕəарҭақəа ҟаҵатəхо иалагеит. Ахырҕəҕəарҭақəа ҟаҵатəхо ианалага, сара атрактор ажыга сыман, убрахь сиаргеит. Лашькьындар инаркны Кəыдрынӡа, иарбан қыҭазаалак, иарбан хырҕəҕəарҭазаалак сышьҭа ахьаным ҳəа акагь ыҟаӡам.

Џьопуа Артиом, Аԥсны Аџьынџьтәылатә еибашьраан хабарда ибжьаӡыз - Sputnik Аҧсны
Иҿымцәаауа агәыӷра: хабарда ибжьаӡыз Артиом Џьопуа иҭоурых

Ахырӷəӷəарҭа

- Уахь еиҳарак уахынла акəын аус анызуаз, ҽынла аибашьра цон, ҽынла аус удруӡомызт, уаха аус уны, иахьа захьӡыз сааины атехника аремонт ахьазыруаз зегьынџьара срыдгылан.

Ахҭысқəа

- Урҭ зегьы ргəаларшəара цəгьоуп, аҳəара уадаҩуп. Ақырҭқəа аҧсцəа адəы иқəыжьыз чмазарак ҟамларц азы урҭгьы рыжра ҳаҿын. Аибашьра анеилга ашьҭахьгьы даҽа мызкы убарҭ сырҿын, амҩа ианыжьлаз сжуан, ацҳақəа ахьырбгаз, иахьҧыржəақəаз машьынак ықəсыртə еиҧш аремонтқəа ҟасҵон, даҽа мызкы сара сзы еибашьран, ус уҳəар ауазар.

Аԥсра абла

- Иаҳҳəозар, Аҭараа аҕацəа рықəлеит, ақыҭа иалалеит, зегьы ықəымҵар ада ҧсыхəа амамкəа иҟалеит. Сара сцар акəхеит ахырҕəҕəарҭақəа рыҟаҵара, хымш убри саҿын. Ахырҕəҕəарҭақəа аныҟасҵа, нас абџьар зкыз дырхынҳəит, дара ақырҭқəагьы наскьеит ишəазар акəхап. Акиноқəа рҿы иаҳдырбоит ажəытəтəи аибашьра, "Адгьыл амца акуеит"- ҳəа, ашəагьы ыҟоуп " Земля горела под ногами"-ҳəа, убри аҩызаҵəҟьа збеит Тамшь, амаамынқəаа ахьҭакыз Барганџьиаа рхəы аҟны. Цагерантəи иҳаихсуан, ак ҧжəеит, ус страктор санналбаа, сыла аџьашьатəы абеит, исзеилкаауамызт адгьыл акəзу ахəшə акəзу ибылуаз, сывараҟны акгьы умбо алҩа ақəч абылра иаҿын. Ус еиҧш иҟаз ахҭысқəа рацəоуп.

Ахырӷəӷəарҭа инаҷыдны

- Еимгеимцарак шааҟалалак Џьгьарда агараж аҟны атехника аус ахьадырулоз сыҟаан. Раҧхьаӡа, абри адизель ҳəа иҟоу Тамшьынтəи ирцəаҳган, иқəыргылан афымцамчы ҳхы иархəаны аус алаҳуан. Атехника аус атəы лымкаала идыруан, инапгьы иҵижьит амеханик Павел Ашəба. Раҧхьа иааргоз атехника ҳара хакəын аиҭашьақəыргылара иаҿыз, аремонттə бригада аҧырҵаанӡа. Нас абригадақəа еиҿыркааит, астонокқəа ааргеит, убрагь ҳрывагылан. Џьгьарда инаркны Тамшьынӡа ҩнаҭацыҧхьаӡа ахыҵəахырҭа "Блиндаж" ҳəа иҟоу шҭак аҿы иахьысымжыз ҳəа ыҟам, ашьҭахьы аимаҧсарақəа ахьсықəшəазгьы ыҟоуп.

ахәыҷи атанки - Sputnik Аҧсны
Ахәыҷи атанки - мап, ахәыҷреи аҭынчреи - ааи

Аԥсҭазаара амҩа

- "Аҧсҭазаара амҩа" - ҳəа ауаа ахəцəа Тҟəарчалҟа изларгоз амҩақəа ыҟамзи ақыҭақəа рыбжьара, уахьгьы амҩақəа еималаны иахьыҟаз реиҭашьақəыргылара саҿын, Ахəҵаҟагьы ицатəымзи, уахь изыхьчақəоз санрыцызгьы ыҟан, аха уахь уиаҟара срышьҭуамызт, сызҿыз аус аҟны саанрыжьуан.

Ахымҩас

- Аҿар ҭахар ҳҭахымызт. Убриакəзар ҟаларын ахы ҳзаҿалоз, ҳхы зыҧхьаҳамкуаз, ҳаҷкəынцəа еиқəхар ҳҭахын. Аибашьра аамҭазы 50 шықəса рҟынӡа сыҟан. Ахырҕəҕəарҭақəа анызжуаз сзыхьчоз аныбналозгьы ыҟан, избанзар убриаҟара ахымҩасқəа рацəан. Нас ус расҳəон слафны: "Сыршьыргьы аӡə дшəыҧшаап, аха атрактор акахьыр ишəмоур ҟалап"-ҳəа ҳахыччалон. Исгəалашəоит, ҽнак сзықəтəаз атрактор хыхь акабина кылҵəаны ахы шалҟьаз, ари ахҭыс ҟалеит Лабра, бымбои ҳаҕа сара схы изҭамыршəит ахы, аихаӡа ауп дызиааиз... Ахы звымҟьаз уи атəы издыруам, сеибашьит изҳəом.

Аразҟы

- Лабраҟа ҳцеит адгьыл жны атанк ҭаҳаргыларц. Атракто наргыланы аҭыҧ гəаҳҭоит ҳəа ҳанааҭыҵуаз иара аҟны имнаӡакəа аснариад каҳаит. Ианкаҳа, уажəшьҭа ишҽеимз здырын сеихеит. Акабина сҭаларц сшьапы анаҿасыргылоз аамҭазы, анаҩс аказарма гылан, аказарма ахыб иақəшəеит, ахыб зегьы аҧсҭҳəа еиҧш ажəҩан иалалеит. Атрактор сынҭалн аус ааруны санаақəҵəиаауаз сахьгылаҵəҟьаз икаҳаит ҽакы. Нас саргьы сеихеит, сышьҭахьҟа ишкаҳауаз, знык наҟ сахьырымбоз санхыҵ, нас иааҟəыҵит. Убас еиҧш, Лабра сзықəшəаз даҽа хҭыск. Уахынлан, атанк азы аминақəа шьҭарҵеит. Лабра акырынтə иргахьан, ирымырххьан. Лабра анҭацəы ахырҕəҕəарҭа ҟаҳҵоит рҳəеит, ус уахынлан усгьы алашарақəа аркны узцаӡомызт, сышнеиуаз дысҧылеит Руслан Чагəаа. "Абра аминақəа шьҭасҵеит, узавсуама?" - иҳəан, сахəаҧшын аҭыҧ: "Хəыҷык унахар, савсыртə иҟалоит"-сҳəеит. Сахьцашаз сцаны аус уны сшаауаз, уажəшьҭа аҩада алашара рбарҭаӡамызт , алашара ркны сшааиуаз, абни дызнахаз минақəа аҩбагьы нааны иҟан, акəрқəа аганқəа ирықəгыланы ицеит, агəҭа изақəымгылеит, иақəгылар иҧжəон, убас уаҟагьы аразҟы сыман, сеиқəхеит.

Лабратәи абаҟа - Sputnik Аҧсны
Сангәлиа Лабратәи ажәылара иазкны: аибашьцәа ашьоура рыԥхьон ԥхьаҟа

Аиааирахь

- Адырра ҳауит амҩақəа ктəуп ҳəа, Аҟəа ргарц ианаҿыз, цəыббрамза аҽеиҩшамҭазы. Лашькьындар инаркны ахырҕəҕəарҭақəа рыҟаҵара ҳаҿын, уа ҳанахырцалак маҷк ҳнаскьон, Тамшь, Адача уаҟагьы иаҳжит. Анаҩс, Кəыдрыҟа ҳнаскьартə иҟарҵеит, аха ахырҕəҕəарҭақəа раҳамҭеит. Аиааира ҳгеит ҳəаа анҳаҳа, Аӡҩыбжьа ахəышəтəырҭа ашьҭахь ҳавагылан, аерманқəа рекипаж "Тигр" атанки сареи. Пушка ала ҳаихсра иаҿын, ахысра рацəаны иҟан, нырцəынтəи ҳаихсра иаҿын. Нас, Аиқ захьӡыз, атанк ныҟəызцоз "Аҧсны афырхаҵа" ҳəа ахьӡ занашьоу, атанк дҭыҵын ус саиҳəеит "Узгылоузеи, иумбаӡои иаауа, уршьуеит"-иҳəеит. Убра сагьынаҧырҵит ҩсааҭк рышьҭахь ҳаибашьцəа еиқəшəеит, Аҟəантəи иаауази мраҭашəаратəи ари Кəыдры еиҧылеит, Аиааира ҳгеит!

Агəаанагара

- Аиашаҵəҟьа уҳəозар, убас агəаанагара сымоуп уажə ҳшыҟоу акəымкəа иҵегьы ҳаиҕьхоит ҳəа, иҵегьы бзиа ҳаибабаны ҳнапқəа еикəыршаны ҳҟалоит, ҧхьаҟа ҳцоит ҳəа. Аха, агəыҕра ҳамоуп, аҿар бзиа аизҳара иаҿуп, аамҭа бзиак ҟалап ҳəа сақəгəыҕуеит. Аҧсны иқəынхо ажəлар зегьы абзиа рбааит, Аиааира нагӡахааит, аныҳəақəа рацəахааит, машəыр ҟамлааит, аизҳара ҟалааит!

Иара убас шәаԥхьар ҟалоит:

Ажәабжьқәа зегьы
0