АҞӘА, жьҭаара 9 – Sputnik, Бадраҟ Аҩӡба. Аконцерн "Росэнергоатом" ашколқәраҟынӡатә хәыҷқәа рыбжьара атурнир еиҿнакааит ҳәа Sputnik Аԥсны иазеиҭеиҳәеит адиректор хада актәи ихаҭыԥуаҩ Џьумбер Тҟьебучаа.
""Росэнергоатом" аҿы Наталиа Шурочкина напхгара зылҭо аиҿкаара аԥҵоуп. Иара аспорттә уснагӡатәқәа мҩаԥнагоит. Ҳара иҳаӡбеит пицундатәи ахәыҷбаҳчақәа рааӡамҭацәа рыбжьара аицлабра мҩаԥаагарц. Аткрнир мҩаԥысуан "Литфонд" аҿы, - иҳәеит иара.
Жьҭаара 7 рзы излагаз аицлабра иалахәын 6 командак. Афиналтә хәмарра мҩаԥган жьҭаара 8 рзы.
"Алахәылацәа зегьы аиҿкааҩцәа рҟынтәи аҳамҭақәа рыҭан. Астадион аҟны ахәаԥшыҩцәа рацәан", - еиҭеиҳәоит "Росэнергоатом" адиректор хада ихаҭыԥуаҩ.
"Литфонд" аҿы аспорттә уснагӡатәқәа рымҩаԥгаразы аҭагылазаашьа бзиақәа аԥҵоуп.
"Ҳәарада ҳара ԥхьаҟагьы асеиԥш иҟоу атурнирқәа мҩаԥаагалоит. Ахәыҷбаҳчагьы ахылаԥшра азааулоит", - иҳәоит Џьумбер Тҟьебучаа.
Аконцерн "Росэнергоатом" уаанӡагьы Аԥсны ахәыҷтәы шьапылампыл ацхыраара анаҭон.
