АҞӘА, жьҭаара 28 – Sputnik, Асмаҭ Ҵәыџьԥҳа. Аԥсны жәлар рартистка Софа Агәмааԥҳа СТС ателеканал аҿы иҭырхуа асериал "Кухня. Война за отель" аҟны аепизодтә роль дыхәмаруеит. Абри атәы радио Sputnik иазеиҭалҳәеит актриса лхаҭа.
Акомедиатә телесериал "Кухня. Война за отель" аҩбатәи асезон ҭырхуан Шәача, Гәбаадәы. Арежиссиор – Евгени Шилиакин. Агәмааԥҳа лажәақәа рыла, асериал аҿы дырҭахын аԥсуа ԥҳәыс бырг. Лара уаанӡатәи афильмқәа ирыхәаԥшны далырхит.
"Комедиатә рольуп. Сфырԥҳәызба – ақыҭа иааӡаз, ақыҭаҿ инхо ԥҳәыс быргуп. Гәызианк шлакәугьы, амцҳәарагьы лылоуп. Дгызмалуп. Лмоҭа Спартак дкыдцаланы длымоуп ԥҳәыс даага ҳәа. Амоҭашьмоҭа ибара лҭахуп", - ҳәа еиҭалҳәоит актриса.
Агәмааԥҳа лгәы иахәеит акинорежиссиорцәа актиорцәа ишрызныҟәо.
"Аҭыхыҩцәа зегьы актиорцәа даара ибзианы ирызныҟәон. Хаҭала убриаҟара сирҽхәон, сацәыԥхашьартә аҟынӡа", - еиҭалҳәоит лара.
"Кухня. Война за отель" – урыстәылатәи комедиатә телесериалуп, ателеканал СТС иҭнахуеит. Асериал актәи асезон ҭыҵит 2019 шықәса рзы. Иара убри ашықәс азы асериал аԥхьахә "Телезвезда -2013", анашьахеит. Ашьҭахь "ТЭФИ-2014" аноминациа "Ситком" аҿы аԥхьахә иаԥсахеит.
Аԥсны жәлар рартистка Софа Агәмааԥҳа дахьҭырхыз асериа ԥхынҷкәынмзазы аекранқәа рахь ицәырҵуеит.
Иара убас шәаԥхьар ҟалоит:
-
Софа Агәмааԥҳа: насыԥ сымоуп сыжәлар рныҳәаԥхьыӡ ахьсыцу
