АҞӘА, жьҭаара 28– Sputnik, Асмаҭ Ҵәыџьԥҳа. Ԥсҳәы ақыҭан Аџьынџьтәылатә еибашьра ду аан иҭахаз аибашьҩы ибаҟа аадыртит жьҭаара 27 рзы ҳәа Sputnik иазаарыцҳаит жәларбжьаратәи акультура-усутә центр "Москва Аҩны" апресс-маҵзураҿы.
Нанҳәа 27, 1942 шықәса рзы Ԥсҳәы иалалеит ашьхахысыҩцәа рдивизиа "Эдельвейс". Дара ирыгәҭакын Аҟәеи Гәдоуҭеи рнапахьы раагара, аха жәамш иреиҳаны ара рыҽрызнымкылеит. Ар ҟаԥшь ари аҭыԥ иахырцеит. 1963 шықәса рзы иҭахаз аибашьцәа аиашьаратә ԥсыжырҭаҿ рыԥсыбаҩқәа анышә иамадан.
"2016 шықәса рзы ара сыҟазаараан схазы исыӡбеит абаҟа еиҭашьақәсыргылоит ҳәа. Даара сеигәырӷьоит иахьа абаҟа ҿыцӡа иахьгылоу", - лҳәоит жәларбжьаратәи акультура-усутә центр "Москва Аҩны" адиректор Зоиа Баутина.
Аремонт-еиҭашьақәыргыларатә усурақәа мҩаԥган Москва ақалақь Адәныҟаекономикатә еимадарақәа рдепартамент ацхыраарала жәларбжьаратәи акультура-усутә центр "Москва Аҩны" алархәны.
Иара убас шәаԥхьар ҟалоит:
-
Жәеизаҩык асовет аруаа Ԥсҳәы ақыҭан ижуп
-
Санчаратәи акаҵәараҿ имҩаԥгаз аекспедициа аусура аихшьаалақәа ҟарҵеит
