АҞӘА, ԥхынҷкәын 26– Sputnik, Бадри Есиава. Аԥсны Аиҳабыра ақәшаҳаҭхеит Арезервтә фонд аҟынтәи быжьҩыки быжьҩык инареиҳаны ахшара змоу ашәарақәа рзоужьразы.
Аиҳабыра раппарат анапхгаҩы Давид Сангәлиа иажәақәа рыла адокумент иазыԥхьагәанаҭоит Агәабзиарахьчареи асоциалтә еиқәыршәареи рминистрра быжьҩыки быжьҩык инареиҳаны ахшара змоу зныктәи ашәарақәа рзоужьзарц.
Ақәҵара инақәыршәаны 10-10 нызқь мааҭ рзоужьхоит быжьҩык-быжьҩык ахшара зааӡо 13 ҭаацәара, 12-12 нызқь мааҭ рыҭахоит ааҩык-ааҩык зааӡо х-ҭаацәарак, ҩ-ҭаацәарак рҿы ирызҳауеит жәҩык-жәҩык ахшара, урҭ 14-14 нызқь мааҭ рзыршәоит. Ҭаацәарак, жәаҩык ахәыҷқәа иахьрызҳауа, ирыҭахоит 16 000 мааҭ.
"Аиҳабыра ррезервтә фонд амалқәа рхархәараз азы" ақәҵара иара убасгьы иазыԥхьагәанаҭоит XVIII Аиҳабырабжьаратә комиссиа аилатәара амҩаԥгаразы аԥаразоужьра аҟаҵара.
Иара убас шәаԥхьар ҟалоит:
- "Жәларбжьаратәи афонд Аԥсны" ахшара рацәа змоу аҭаацәара ирыцхрааит
