"Жәлар Реизара ахантәаҩы Валери Кәарҷиа аилатәара алагамҭаз дазааҭгылеит атәылаҿы ауаажәларратә ҭагылазаашьа зеиԥшроу аполитикатә кризис ашьҭахь. Иара убас иара иажәақәа рыла Аԥсны ахада инапынҵақәа назыгӡо Валери Бганба иганахьала шьоукы ақәыӷәӷәара аадырԥшуеит ҳәа, уи ауп изыхҟьазгьы игәамбзиара ҳәа азгәеиҭеит. Адепутат Лаша Ашәба иажәақәа рыла, уи азҵаара алацәажәара ҟалон иара ихаҭа аилатәара далахәызҭгьы. Анаҩс иӡырган адепутатцәа рыхәҭак еиқәдыршәаз ажәлар рахь ааԥхьара. Уи ахықәкы хада атәыла хада иалхрақәа ҟалаанӡа ауаажәларратә ҭагылазаашьа ҭышәынтәаланы ицаларцаз. Аха адепутатцәа рыхәҭак уи иаҿагылеит, аҭагылазаашьа еиҳагьы еицәахар алшоит ҳәа ргәаанагара рҳәеит. Адепутат Александр Анқәаб иакәзар, ааԥхьара зныз ақьаад ахкьыԥхьаа ԥижәеит. Уи ашьҭахь аилатәара иацҵан ажурналистцәа аламырхәӡакәа", - ҳәа еиҭеиҳәеит Аҩӡба.
Инеиҵыху аиҿцәажәара шәазыӡырҩы арадио Sputnik Аԥсны аефир аҿы.
