АҞӘА, ажьырныҳәа 29 - Sputnik. Аԥсны араионқәак рҟны афымцалашара арцәара аграфик ҿыц ала имҩаԥгахалоит, абри атәы аанацҳауеит "Амшынеиқәафымцамч".
"Ажьырныҳәа 29 рзы ПС Аҟәа 2, ПС Афон Ҿыц, ПС Мҵара, ПС Дәрыԥшь, ПС Гудаута-тиага, ПС Гәдауҭа 110 (Т1) афымцалашара ырцәахоит асааҭ 17:30 инаркны асааҭ 19:00 рҟынӡа. Ари аамҭалатә еиҭакроуп", - аҳәоит адырраҭараҿы.
Ажьырныҳәа 27 инаркны Аԥсны араионқәа зегьы рыҟны аамҭа-аамҭала афымцалашара дырцәо иалагеит. Уи зыдҳәалоу Џьуартәи аӡеизакырҭаҟны аӡы агхара иахьаҿу ауп.
АУН "Амшынеиқәафымцамч" афымцалашара арцәара аграфик рыланаҳәеит.
Иахьазы Џьуартәи аӡеизакырҭаҿы аӡы аҩаӡара 445 метра роуп иҟоу. Аӡы аҩаӡара мышкы иалагӡаны метрак аҟынӡа илаҟәуеит. Аԥхьаӡарақәа рыла афымцалашара мышктәи ахархәара 4,5 миллион киловатт-сааҭ рҟынӡа еиҵатәымхар ма урыстәылантәи иаагамхар, жәабран 10-12 рзы астанциа аус амур ҟалоит, ма уахыки-ҽнаки рыҩнуҵҟа ҩба-хԥа сааҭ аус аулоит.
ЕгрыГЕС ахьыҟоу аҭыԥқәа рҿы ақәоура маҷуп. Иахьынӡаԥхарраз афымцамч ахархәара уахыки-ҽнаки рыла 8 - 8,5 миллион киловатт-сааҭ ыҟан. Ишаахьҭахаз, уи иацлеит.
Ажьырныҳәа 22 рзы Аԥсны Аекономика аминистрраҿы имҩаԥысит Аԥсны Аҳәынҭқарреи Урыстәылатәи Афедерациеи рыбжьара асоциал-економикатә зҵаарақәа рзы аусутә еилацәажәара.
Аԥсны Аекономика аминистр Адгәыр Арӡынба Нхыҵ Кавказ аусқәа рзы аминистр ихаҭыԥуаҩ Игор Кошин иԥылараан аӡынтәи аамҭазы афымцамч Урыстәылантәи Аԥсныҟа аашьҭра азҵаарагьы иалацәажәан. Ари азҵаара ацәырҵра адҳәалоуп Џьуартәи аӡеизакырҭаҿы аӡы алаҟәра.
Иара убас шәаԥхьар ҟалоит:
- "Амшынеиқәафымцамч" афымцалашара арцәара ириашоу аграфик рыланаҳәеит
-
Ҭемур Ҷкотуа: афымцалашара арцәара алифтқәа ирԥырхагоуп
