АҞӘА, ажьырныҳәа 29– Sputnik. Витали Дараселиа ихьӡ зху агәыҳалалратә фонд аԥҵоуп Очамчыра ҳәа Sputnik иазеиҭеиҳәеит Очамчыра араион ахадара аҿари аспорти рыҟәша аиҳабы Ҭимур Пачлиа.
"Витали Дараселиа ихьӡ зху агәыҳалалратә фонд аԥырҵеит Очамчыра ашьапылампылтә команда "Ерцахә" аветеранцәа, ашьапылампыл иахьатәи аԥеиԥш азы агәҭынчымра аазырԥшуа. Витали Дараселиа ихьӡ зху астадион аҭагылазаашьа бааԥсуп. Уажәы афонд ацхыраарала иара аиҭашьақәыргылара ҳҭахуп", - иҳәеит иара.
Ҭимур Пачлиа дгәыӷуеит очамчыра ашьапылампыл аҿиара ацхыраара азҭо ауаа ҟалап ҳәа.
"Ҳгәы иҭоуп Витали Дараселиа ихьӡ зху амузеи иҩнаҿы иҟаҳҵап ҳәа. Уи адагьы имемориал аиҭарҿыцра аҭахуп. Уи адагьы ахәыҷтәы шьапылампыл ацхыраара аҭатәуп, иаԥаҳҵарц ҳҭахуп Витали Дараселиа ихьӡ зху ашьапылампылтә академиа", - иҳәеит Пачлиа.
Еицырдыруа ашьапылампыласыҩ Витали Дараселиа ашьапылампыл асра далагеит иқалақь гәакьа очамчыра аҿы.
Витали Дараселиа Қырҭтәыла ачемпионат аҟны актәи исезон мҩаԥигеит 1974 шықәса рзы очамчыратәи "Амирани" далахәны, иагьҭаиршәит 20 мпыл.
1975 шықәса рзы қарҭаа ркоманда далахәны СССР ачемпионат аҿы дықәгылеит Витали. Ташкенттәи "Пахтакори" қарҭтәи "Динамои" еицыхәмаруан астадион "Локомотив" аҿы.
Қарҭтәи "Динамо" аҿы Витали Дараселиа афбатәи аномер ҳәа дыҟан. Акоманда 1976 шықәса рзы СССР Ахраҿаз ахәмарраан ахԥатәи аҭыԥ иоуит. 1977 шықәса рзы "Динамо" аразны медал анашьахеит. 1978 шықәса рзы Витали Дараселиа акоманда алахәыла иҳасаб ала СССР дачемпионхеит.
Витали Дараселиа иҭаиршәхьаз ампылқәа ираҳхаз мпылны иҟалеит 1981 шықәсазы қарҭтәи "Динамои" анемец клуб "Карл Цейсси" реицыхәмарраан иҭаиршәыз ампыл. Афиналтә хәмарра анҵәара х-минуҭк шагыз Витали Дараселиа амба ампыл ҭаиршәит.
Уаанӡа 1:1 ҳәа иааиуан. Давид Кипиани иҟынтәи иоуз ампыл Витали Дараселиа анемеццәа рымба аҭаршәра илшеит.
Витали Дараселиа –очамчыратәи ашьапылампылтә школ дааӡамҭоуп, 1978 шықәса рзы СССР дачемпионхеит, 1981 шықәсазы УЕФА Ахраҿа даиааиҩуп. "Динамо" Қарҭ аҟны дыхәмаруан (1975 —1982). 1978 шықәса рзы СССР ачемпион. 1981 шықәсазы УЕФА Ахраҿа аиааиҩы. Еизгоу СССР акоманда далахәны 22 хәмарра мҩаԥигеит, ампылқәа 3 ҭаиршәит.
Ԥхынҷкәын 13 1982 шықәсазы машәырла дҭахеит.
Иара убас шәаԥхьар ҟалоит:
- Ашьапылампыласыҩ Витали Дараселиа ибаҟа еиҭашьақәдыргылоит
-
Очамчыра дыргәаладыршәон Витали Дараселиа
