АҞӘА, мшаԥымза 1 – Sputnik. Аԥсны акоронавирус зыхьуа ҳәа уаҩы дшьақәыргылаӡам ҳәа адырра ҟанаҵоит ауааԥсыра COVID-19 рацәыхьчаразы Акоординациатә штаб.
Аҟәатәи аҿкытә хәышәтәырҭаҿы ари аҿкы змоу ҳәа уаҩ дыҟаӡам, иадҵаалаз 14-ҩык рҟынтә ааҩык ахьҭа рылаланы иҟан, даҽа фҩык – акьатеитә инфекциа рыман.
Гәдоуҭатәи ахәышәтәырҭаҿы ишьҭоу апациент акоронавирус азы дангәарҭа ишиамымз шьақәырӷәӷәахеит.
Аштаб адыррақәа рыла, аҵыхәтәантәи уахыки-ҽнаки рыла Аԥсны Агәабзиарахьчара иаԥнаҵаз аимадаратә центр ахь иасит 350-ҩык ауааԥсыра.
Автомашьынатә постқәа рҿы аус руеит амедусзуҩцәеи азинхьчаҩцәеи рыбригадақәа, урҭ арныҟәцаҩцәеи апассаџьырцәеи ршоура гәарҭоит.
Уаанӡа адырра шыҟаҵаз ала, ауааԥсыра иалагалоу акарантинтә ԥҟарақәа ирықәымныҟәо иалагар, аиҳабыра атәыла зехьынџьара акоменданттә сааҭ аларгалара акәхоит, ақалақьқәа рыбжьарагьы аиҭанеиааира ааныркылоит.
Иара убас шәаԥхьар ҟалоит:
- Амҩақәа рҿы агәаҭарқәа шцо: Аԥсны аҭагылазаашьа ҷыда ахгашьа
-
Аҩнуҵҟатәи аусқәа рминистр Аԥсны акоменданттә сааҭ алагалазарц ахәҭаны ибоит
