АҞӘА, мшаԥы 14– Sputnik, Бадри Есиава. Аԥсуа спортсмен Дмитри Ӷәазаа далахәхоит авиртуалтә автоеиԥхныҩлара "LADA Sport ROSNEFT eRace". Абри атәы Sputnik акорреспондент изеиҭеиҳәеит аспортсмен ихаҭа.
"Ҳәарада аиԥхныҩлараҵәҟьа иузадкылом, аха ас еиҳа еиӷьуп зынӡа акгьы ҟаумҵар аасҭа. Ҽазыҟаҵара дууп. Уи азоуп асеиԥш иҟоу авиртуалтә еиԥхныҩлара зымҩаԥырго", - иҳәеит иара.
Ӷәазаа иҳәеит уажәы иара акарантин дшықәныҟәо, аамҭагьы рацәаны ишимоу аицлабрақәа рылахәхаразы аҽазыҟаҵараз.
Аицлабрақәа ирылахәхоит 33-ҩы пилот. Дара ықәгылоит акласс "Туринг" иатәу автомашьынақәа рыла. Атрассазы иалхуп малаизиатәи Сепанг.
"Иалахәу зегьы профессионалтә пилотцәоуп. Аиааиразы аԥхьахә ҳәа кыр ҟало иҟамло сыздырам", - иҳәеит аспортсмен.
Аспортсмен Москва дыҟоуп. Аамҭа анимоу астимулиатор ала аҽазыҟаҵарақәа мҩаԥигоит.
Иара убас шәаԥхьар ҟалоит:
- Дмитри Ӷәазаа Урыстәыла ахраҿа игеит Mitjet 2L акатегориа PRO аҿы
-
Дмитри Ӷәазаа "Шесть часов Ле-Мана" аҿы аиааира игеит
