АҞӘА, мшаԥы 16– Sputnik, Бадри Есиава. Гәдоуҭатәи аџьармыкьа мшаԥы 17 рзы иаартхоит Гәдоуҭа араион ахадараҿы иҟоу Аоперативтә штаб аӡбарала ҳәа Sputnik иазеиҭалҳәеит араион асанитар-епидемиологиатә маҵзура аиҳабы Инга Ҷанԥҳа.
"Аџьармыкьа акәша-мыкәша хылаԥшра ззура алымшо аҭагылазаашьа шьақәгылеит. Аҩныҵҟа аус зуаз зегьы аџьармыкьа иаԥну аҭыԥқәа рахь рыхәаахәҭра хдыртит. Ауаа рацәа еизеит. Иҟоу аҭагылазаашьа азхьаԥшра аҭаны араион ахадара рҿы ажәалагала ҟасҵеит аџьармыкьа аадыртырц. Аиҳараҩык ажәалагала адгылара арҭеит", - ҳәа лҳәеит лара.
Ҷанԥҳа илҳәеит мшаԥы 13 рзы аџьармыкьа аусзуҩцәа араион ахадара аҿаԥхьа ишеизаз аџьармыкьа аартразы адҵа ҟаҵо. Дара ражәақәа рыла рԥарақәа нҵәеит, рҭаацәарақәа ирҿарҵо рымам, Амшаԥныҳәа рзазгәаҭом.
"Аџьармыкьа аартра аламҭалаз аҩныҵҟа зегь арзҩыдара иахрыжьоит, идрыцқьоит. Аҭиҩцәа зегьы асабрадақәа рҿазароуп, анапҭырԥақәа рымӷазароуп, аҩныҵҟа аус рулоит амедицинатә усзуҩцәа. Аҩныҵҟа хәҩы-хәҩыла иҭалалароуп", - ҳәа лҳәеит лара.
Аџьармыкьа аартра ашьҭахь ҩымш рыҩныҵҟа аҭагылазаашьа ҳашьклаԥшуеит. Иахәҭаны иаабар еиҭаҳаркуеит ҳәа лҳәеит лара.
Ҷанԥҳа лажәақәа рыла раионцыԥхьаӡа аепидемиологиатә ҭагылазаашьа иаҿырԥшны иӡбалатәуп асеиԥш иҟоу азҵаарақәа.
Акоронавирус иазку ажәабжьқәа рзы аҵыхәтәантәи адыррақәа шәрыԥхьар ҟалоит абра>>
