АҞӘА, мшаԥы 18 – Sputnik, Бадри Есиава. Гагратәи аҩнеихагыла алкра аанкылахоит хәба-быжьба мшы рыҩнуҵҟала ҳәа Sputnik акорреспондент изеиҭеиҳәеит Ауааԥсыра акоронавирустә ҿкы рацәыхьчаразы акоординациатә штаб аҳәаақәҵаҩ Рауль Лолуа.
"Хәымш-бжьымш рыла Гагратәи аҩнеихагыла иақәыз акарантинтә ԥкрақәа ақәхзаауеит. Жәохә мшы ичҳатәын, абри аҿҳәара шьҭа иааигәахоит. Аҭагылазаашьа аиӷьхара иаҿуп, аха уа дынхоит уажәыгьы зчымазара иалымгац 95 шықәса зхыҵуа аԥҳәыс бырг. Лара ахылаԥшра ҷыда лымазаауеит", – иҳәеит Лолуа.
Мшаԥы 7 рзы Гагра ақалақь, Абазгаа рымҩала игылоу аҩнеихагыла иакәшаны иркит азинхьчаратә усбарҭақәа русзуҩцәа, уа инхоз руаӡәы акоронавирус шимоу анышьақәырӷәӷәаха ашьҭахь. Ачымазаҩ Гәдоуҭатәи араионтә хәышәтәырҭа хадаҿы дышьҭарҵеит. Аамҭак ашьҭахь уа дларгеит аҿкы здырбалаз иара иԥҳәысгьы.
Мшаԥы 11 рзы еилкаахеит акоронавирустә ҿкы COVID-19 лцәа ишалоу дара ргәылара инхо 95 шықәса ирҭагылоу аԥҳәыс. Аха лара ахәышәтәырҭа аҭалара мап ацәылкит.
Акоронавирус аҿагыларазы аоперативтә штаб мшаԥы 17 рзы адырра ҟанаҵеит раԥхьа аҿкы здырбалаз апациент игәабзиара ашьақәгылара ишаҿу: агәаҭара иаанарԥшит аҿкы уаҳа ицәа ишалам. Уи ахәышәтәырҭа илҩаара даздырхиоит. Егьырҭ аҩыџьагьы рҭагылазаашьа уацәшәартә иҟам.
Акоронавирус иазку ажәабжьқәа рзы аҵыхәтәантәи адыррақәа шәрыԥхьар ҟалоит абра>>
