АҞӘА, лаҵара 22 – Sputnik. Иахьазы ареспубликаҿы аепидемиологиатә ҭагылазаашьа ҭышәынтәалоуп иҳәеит Агәабзиарахьчара аминистр Ҭамаз Ҵахнакьиа аиҿкаара "Ҳара ҳаидгылоуп" имҩаԥнагоз апресс-конференциаҿы лаҵара 22 рзы.
"Ҳара есыҽны астудентцәа авирус рылоу ирыламу игәаҳҭон. Дара зегьы еиҿкаарыла аҳәааҟынтәи иааганы акарантин иахҳажьит. Ус шакәызгьы, 16-ҩык авирус рыдбалан. Урҭ рҟынтәи иҟоуп ахәышәтәырҭаҟынтәи илҩаау, иҟоуп макьаназ зыхәышәтәра иаҿу", - иҳәеит иара.
Аобсервациа иахысуеит авирус змоу ирныруа амедусзуҩцәагьы.
"Ачымазцәа ирныруа амедусзуҩцәа 14 мшы акарантин иахысроуп, мамзаргьы аҽыԥхьакра мҩаԥыргароуп. Аҽыԥхьакратә режим аҩны изықәымныҟәо асасааирҭа "Аиҭар" ахь инаагоит", - иҳәеит аминистр.
Ҭамаз Ҵахнакьиа иазгәеиҭеит аепидемиаан зхырхарҭа ԥсаху Гәдоуҭатәи ахәышәтәырҭа иахьазы иахәҭоу зегь рыла ишеиқәыршәоу – ахыхьчагатә хархәагақәа, ахәшәқәа рыла.
Гәдоуҭатәи ахәышәтәырҭа 700-ҩык акоронавирустә инфекциа заур алшо ауаа иахьазы иаднакылартә иҟоуп. Аҿкчымазаратә ҟәшаҿы 40 иара-ҭыԥ хианы иҟоуп.
Аоперштаб адыррақәа рыла, ахәышәтәырҭа иахьазы иҭоуп 17-ҩык. Хҩык лаҵара 21 рзы иҭырҩааит.
Ареспублика апандемиа қәҿиарала ишаҿагылоугьы, макьана аҽырҭынчра иаамҭам, адунеи аҿы акоронавирус шалаҵәац иалаҵәоуп иҳәоит аминистр.
Иахьазы Аԥсны 25-ҩык авирус рыхьхьеит. Фҩык ргәабзиара шьақәгылахьеит, аӡәы лыԥсҭазаара далҵит.
Иара убас шәаԥхьар ҟалоит:
-
Аԥсуа наплакыҩцәа реиҿкаара "Ҳара ҳаидгылоуп" 56 миллион рҟынӡа аԥара еизнагеит
-
Ичмазаҩхаз ирныруаз акурсантцәа ркарантин иацҵахоит
