АҞӘА, ԥхынгәы 16 – Sputnik. Ахылаԥшра-аушьҭырҭатә ҭыԥ "Егры" ԥхынгәы 15 асааҭ 12:00 рзы 442-ҩык ахысхьан. Абри атәы Sputnik иазааицҳаит Аԥсны АШәМ Аҳәаахьчаратә отриад аиҳабы Рустам Латипов.
Иара иажәақәа рыла, агуманитартә коридор ахысраан иарбанзаалак еилагарак ыҟамызт.
"Аҭагылазаашьа еснагь иҟаз арежим иақәшәоит. Қырҭтәыла аҵакыраҿы иҟаз, Аԥсныҟа аара зҭахыз иахәҭаз алшара рыҭан. Макьаназ зегь ҭынчроуп. Акоридор даҽа ҩымш иаартхоит", - иҳәеит иара.
Ареспублика асанитартә ҳақьым хада Лиудмила Скорик лажәақәа рыла, ахылаԥшра аушьҭырҭатә пункт "Егры" иахысуа рҭагылазаашьа агәаҭаразы аус руеит Аԥсны Ашәарҭадаратә маҵзура, Аԥсны Аҩныҵҟатәи аусқәа рминистрра, араионтә санитар-епидемиологиатә маҵзурақәа русзуҩцәа.
Аҳәынҭқарратә ҳәаа ахысра ҟалоит анаҩстәи адокументқәа рымазаараан:
- Атәыла анҭыҵ ауаҩы ихаҿра шьақәзырӷәӷәо Аԥсны атәылауаҩ итәылауаҩшәҟәы;
- Аԥсны атәылауаҩ иҩнуҵҟатәи азеиԥшуаажәларратә тәылауаҩшәҟәы (2016 шықәсазтәи);
- Аԥсны аҵакыраҿы иааиԥмырҟьаӡакәа инхо аҳәаанырцә тәылауаҩ ма атәылауаҩра змам ахаҿы анхарҭа аиуразы ишәҟәы;
- Аԥсны Аҩнуҵҟатәи аусқәа рминистрра ирынаҭаз аформа №9 ала аилыркаага;
- 14 шықәса рҟынӡа зхыҵуа ахәыҷқәа ирымазароуп аиразы аршаҳаҭга.
Қырҭтәыла иҟоу Аԥсны атәылауаа рзы аушьҭырҭатә ҭыԥ "Егры" Аԥсны аганахьала даҽа гуманитартә коридорк 2020 шықәса ԥхынгәы 13 рзы ишаартхо азы адырра ҟаҵан ԥхынгәы 10 рзы.
Уаанӡа акаридор аартын лаҵара 26-31 (532-ҩык), рашәара 22 - 24 (1 111-ҩык) рзы.
