АҞӘА, абҵара 3 – Sputnik. Аԥсны асезонтә еимҳәазы алаҵаҟаҵара абҵара 9 инаркны иалагоит ҳәа Sputnik иазеиҭеиҳәеит Агәабзиарахьчара аминистрра хәшәылеи медицинатә хархәагалеи аиқәаршәараз аусбарҭа аиҳабы Ахра Аџьба.
"Амчыбжь анҵәамҭазы 1000 дозак алаҵа ҳауеит. Иаанхо ахыԥхьаӡара абҵарамза анынҵәо иҳауеит", - иҳәеит Аџьба.
Аџьба иажәақәа рыла х-еилахәыракны иҟоу алаҵа "Ультрикс Квадри" ахәыҷқәа роуп иззырхо, ԥшь-еилахәыракны иҟоу алаҵа "Совигрипп" адуцәа роуп иззыҟарҵо.
Аџьба иҳәеит изҭаху зегьы хатәгәаԥхарала аполиклиникаҿ инеины хәыда-ԥсада иҟарҵар шыҟало.
Алаҵа аныҟарҵа ашьҭахь 14 мшы рыҩныҵҟа ауаҩытәыҩса ицәеижь аҿы иҿио иалагоит ацәеижьҿагылақәа – авирус хызҽуа.
Алаҵа аашьҭра аамҭа хьшәахеит избанзар Урыстәыла ақәҵара ҭыҵит 60 процент ауааԥсыра алаҵа рзыҟаҵазарц азы. Азауадқәа аминистрра адырра арҭеит убри азы алаҵа аашьҭра аграфик шеиҭаҵуазы.
