АҞӘА, абҵара 9 – Sputnik. Аӡбаҩ Мараҭ Аҩӡба ихантәаҩрала Аҟәатәи ақалақьтә ӡбарҭа абҵара 8 рзы Аԥсны ААР ашьаусҭҵааратә усбарҭа азыҳәа нагӡо Руслан Қаџьаиа иҭакразы аӡбра аднакылеит. Абри атәы аанацҳауеит Аҟәатәи ақалақьтә ӡбарҭа.
Заанаҵтәи аусҭҵаара адыррақәа рыла Руслан Қаџьаиа арыжәтә ыжәны амҩатә машәыр ҟаиҵеит ҳәа агәызҩара ыҟоуп. Амҩатә машәыр ҟалеит ареспубликатә трасса Ԥсоу-Егры, Очамчыра араион Кындыӷ ақыҭа аҿы абҵара 5 ахәылбыҽха, асааҭ 18.45 рзы.
"Руслан Қаџьаиа иумҭа аҵанакуеит Аԥсны Аҳәынҭқарра АЗ ахәҭаҷ 263 ахәҭа 6 (автомашьына аԥсҟы зку амҩатә ԥҟаррақәа еилеигеит, уи иахҟьаны ҩыџьа ма инареиҳаны рыԥсҭазаара иалҵит)", - аҳәоит адырраҭараҿы.
Иара убасгьы иазгәаҭоуп Руслан Қаџьаиа иҟалаз ихы иадиҵеит, иҭахаз ргәакьацәа рҿаԥхьа аҭамзаара шьҭеиҵеит, аҩнтәы баандаҩра изалхзарц аҳәара зуаз ихьчаҩ ипозициа иақәмыршәакәа ддырбаандаҩырц аҳәара ҟаиҵеит.
Аӡбацәа Руслан Қаџьаиа 2021 шықәса ажьырныҳәа 5 рҟынӡа дҭакызааит ҳәа ақәырҵеит.
Руслан Қаџьаиа ахара ихароуп ҳәа дшьам ихара шьақәырӷәӷәаны аӡбамҭа ала аӡбра азинмчра аиуаанӡа.
Иара убас шәаԥхьар ҟалоит:
- Кындыӷ иҟалаз амҩатә машәыр алахәыла иганахь ала ашьаус хацыркуп
