АҞӘА, ԥхынҷкәын 1 – Sputnik, Бадри Есиава. Ахәырма аҽаҩра 40 процент рҟынӡа араион аҿы ирзымҭикәа иаанхеит ҳәа Sputnik иазеиҭеиҳәеит Гәдоуҭа араион ақыҭанхамҩа аусбарҭа аиҳабы Иури Кәарцхьиа.
Кәарцхьиа иҳәеит, уи мзызны иаиуз аурыс-аԥсуа ҳәааҿы аԥҟара ҿыцқәа ралагалара иҟарҵаз ауадаҩрақәа роуп ҳәа.
"Ахәырма аӡәгьы игом. Саргьы исҭааит, аишьыкьқәа ирҭаҵаны хәымш аахәаҩ сизыԥшын, аха дцәырымҵит. Маҷ-маҷ иԥхасҭахоит. Асеиԥш аҭагылазаашьа здысҳәало аҳәаа аусуроуп", - иҳәоит иара.
2020 шықәсазы Гәдоуҭа араион аҿы 5 000 тонна рҟынӡа ахәырма рҭааит. Ҵыԥх акәзаргьы уи еиҵамкәа иҟан. Араион аҿы ахәырма ахьеиҭаҳау аҭыԥқәа 185 гектар рҟынӡа инаӡоит.
Аԥснытәи ауааԥсыра раалыҵ аҭира ауадаҩра аҵалеит Шәачатәи аҳазалхырҭа Краснодартәи аҳазалхырҭа ианаларҵа ашьҭахь.
Иаку Евразиатәи аекономикатә комиссиа аӡбра инақәыршәаны Аԥснынтәи Урыстәылаҟа уаҩԥсык имоуп азин адекларациа ада 25 кьыла аалыҵ ахигарц.
Убри аан атауар ахьынтәааигаз азы аурыс-аԥсуа ҳәааҿы асанитартә маҵзура ирырҭо асертификат имазароуп.
