АҞӘА, хәажәкыра 1 – Sputnik. Акоронавирус аҟынтәи урыстәылатәи алаҵа "Спутник V" Аԥсныҟа аагара азҵаара рыӡбоит атәылақәа рыҩба реиҳабырақәа рыҩаӡарала ҳәа арадио Sputnik иазеиҭеиҳәеит ареспублика Агәабзиарахьчара аминистр Ҭамаз Ҵахнакьиа.
"Иахьынӡаздыруала апроцесс активла имҩаԥысуеит. Сгәыӷуеит хара имгакәа алаҵа ааргап ҳәа. Асанитар-епидемиологиатә маҵзура иахәҭоу аграфик шьақәнаргылоит. Аԥхьа алаҵа рзыҟаҵахоит амедусзуҩцәа, амчратә структурақәа русзуҩцәа", - ҳәа иҳәеит иара.
Аминистр иажәақәа рыла ихадароу алаҵа аҟазаареи изҭаху уи азы аҭагылазаашьа роуртә еиԥш аҟалареи роуп.
"Алаҵаҟаҵара шымҩаԥысуа ҳашьклаԥшып, нас аиҭаагара азҵаара ҳалацәажәап" ҳәа иҳәеит аминистр.
Аԥхьатәи аетап аан 10 000 доза алаҵа аагахоит ҳәа иҳәеит Ҭамаз Ҵахнакьиа.
Алаҵа "Спутник V" Гамалеи ихьӡ зху Ацентри РФПИ еицыҟарҵеит. Ари алаҵа адунеи аҟны раԥхьаӡа акәны COVID-19 хызҽуа ҳәа иҭарҩыз лаҵахеит.
Уи адагьы, Урыстәылатәи агәабзиарахьчара аминистрра жьҭаарамзазы иҭанаҩит даҽа лаҵакгьы - "ЭпиВакКорона", уи новосибирсктәи ацентр "Вектор" иаԥнаҵеит. Иара убасгьы Урыстәыла агәабзиарахьчара аминистрра иҭанаҩит COVID-19 хызҽуа ахԥатәи алаҵа "КовиВак". "КовиВак" аԥҵоуп Урыстәылатәи аҭҵаарадыррақәа ракадемиа иатәу М.П. Чумаков ихьӡ зху Аиммунологиатә препаратқәа рыҭҵаареи аус рыдулареи рфедералтә ҭҵаарадырратә центр аҟны.АҞӘА, 1 мар — Sputnik.
