АҞӘА, хәажәкыра 8 - Sputnik, Асмаҭ Ҵәыџьԥҳа. Ахра Аҩӡба дзыхьчоз Галеха Гасанов, Аслан Гуатижев, Андреи Локтионов рганахьала аӡбамҭа аднакылеит Аҟәатәи ақалақьтә ӡбарҭа- мызкы ҭакрала ирхыргарц.
Уи аԥхьа Ахра Аҩӡбеи, уи дзыхьчоз руаӡәк Станислав Культеи мызкы ҭакрала ирхыргарц азы аӡбамҭа рыдыркылахьан.
Хәажәкыра 7 рзы, АШәМ ахыбраҟны рус рыӡбон Атәыла ахада уаанӡатәи ицхырааҩ Ахра Аҩӡбеи иҩызцәеи. Дара ахара рыдырҵоит заанаҵ еибыҳәаны изакәанымкәа абџьар ахьырҵәахуаз азы. Абри аус аганахьала иазгәаҭоуп ҩышықәса инаркны фышықәсанӡа ҭакрала ахгара.
Агәыԥ "Пятнашка" акомандир, Аԥсны ахада уаанӡатәи ицхырааҩ Ахра Аҩӡбеи иҩызцәа хәҩыки аанкылан хәажәкыра 4 рзы. Аԥсны ААР АШәМ аусзуҩцәа иҩны аҩныҵҟа аԥшаарақәа мҩаԥыргеит, иаадырԥшит абџьари аџьаԥҳани.
