АҞӘА, мшаԥы 30 - Sputnik. Аԥсны иҟоу Урыстәылатәи Аладатәи арратә округ арратә база аррамаҵзурауаа рхы аладырхәит жәларбжьаратәи арккаратә акциа "Аиааира адиктант". Абри атәы аанацҳауеит аокруг апресс-маҵзура.
Адиктант 25-25 зҵаара аман, ҩ-вариантк рыла ишьақәгылан. Аҭакҟаҵара иазоушьҭын 45 минуҭ.
Зынӡа акциа иалахәын зықьҩык рҟынӡа Аԥсны иҟоу Урыстәылатәи Аладатәи арратә округ арратә база аррамаҵзурауааи, урҭ рҭаацәареи, аграждантә ҟазауааи, иара убасгьы урыстәылазегьтәи ахәыҷы-қәыԥштә арра-патриоттә уаажәларратә еиҿкаара "Юнармия" рҟынтәи аҿари.
Акциа мҩаԥган иазырхиаз аудиториақәа рҿи апалигонқәа Ҵабали Нагвалоуи рҿи.
Ауснагӡатә иахықәкы хаданы иҟоуп аҭоурыхтә гәалашәара аиқәырхара, аҭоурых адырра аизырҳара, Аџьынџьтәылатә еибашьра аҭҵаара.
