АҞӘА, рашәара 2 - Sputnik. Урыстәылатәи атеатртә критик Павел Руднев ахәшьара ҳарак аиҭеит РУСДРАМ ақәыргыламҭа "Електра". Аспектакль дырбан афестиваль "Радуга" аҿы Санкт-Петербург. Абри атәы акритик Павел Руднев арадио Sputnik иазеиҭеиҳәеит.
"Даара иџьоушьаша усумҭоуп. "Електра" санахәаԥш ашьҭахь арежиссиор-ақәыргылаҩ Артиом Устинов сиқәгәырӷьоит. Уаҳа назҭахым артистцәа, асцена ссирқәа. Атеатргьы арежиссиоргьы ҭабуп ҳәа расҳәоит аусумҭа хазыназ", - иҳәеит Руднев.
Акритик иара убасгьы иҳәеит аспектакль ахәмарыҩцәа ишрылшаз ирҭахыз зегь ахәаԥшҩы изнагара, ароль хада ихәмаруаз Мадлена Барцыцԥҳа лакәзар, ишлылшаз лҿаԥхьа иқәгылаз адҵа анагӡара.
Иара убасгьы иҳәеит атеатр есааира ишыҿио, урыстәылатәи атеатрқәа ирыдҩыло ишнеихьоу.
"РУСДРАМ иарбанзаалак афестиваль ианалахәу ижәларбжьаратәны иҟанаҵоит. Атеатр ақәыргыламҭақәа аурыс театртә школ иазааигәоуп, аԥсуа культура иалху аекзотика рымоуп", - иҳәеит Руднев.
РУСДРАМ адиректор Иракли Хынҭәба асоциалтә ҳақәа рҿы иҩуан аспектакль ахь абилеҭқәа заа ишырҭихьаз, аҭыԥқәа ишрыцҵатәхаз.
Аспектакль иара убасгьы иахәаԥшит 50-ҩык атеатртә усзуҩцәа: акритикцәа, арежиссиорцәа, атеатрқәа рнапхгаҩцәа.
Аспектакль "Електра" аԥхьарбара мҩаԥысит РУСДРАМ аҿы жьҭаара 30 2019 шықәса рзы. Иара ықәиргылеит арежиссиор қәыԥш Артиом Устинов.
Искандер ихьӡ зху Аурыс драматә театр 2020 шықәсазы Санкт-Петербург имҩаԥысуаз Жәларбжьаратәи атеатртә фестиваль "Радуга" изалахәымхеит акоронавирустә пандемиа иахҟьаны.
Афестиваль "Радуга" 2000 шықәса раахыс имҩаԥыргоит Санкт-Петербург Ахәаԥшыҩ қәыԥш итеатр аҿы. Есышықәса афестиваль рҽаладырхәуеит ЕАА, Великобританиа, Германиа, Франциа, Бельгиа, Естониа, Болгариа, Бырзентәыла уҳәа ртеатрқәа.
