АҞӘА, рашәара 16 – Sputnik, Бадраҟ Аҩӡба. Риҵатәи амилаҭтә парк аусзуҩцәеи Гагратәии Гәдоуҭатәии аиқәырхаҩцәеи аӡы иагаз атуристка лыԥшаара иацырҵоит ҳәа аанацҳауеит Аԥсны АҶА апресс-маҵзура.
"Уажәы асқәа ԥсасиуеит, аӡы уи иахҟьаны аҽышьҭнахуеит. Уи адагьы аӡы хәышьуп, аԥшаарақәа аруадаҩуеит. Аӡы лаҟәаанӡа аԥшаарақәа алҵшәа рмоур ҟалоит", - ҳәа рҳәоит аусбарҭаҿы.
Амшын ахь дагазар, ушьҭа дрыԥшаахьазаарын, иӡааҟәрылаз иԥсыбаҩ амшын аҿықә ахь иқәнажьуеит азы ҳәа рҳәоит аусбарҭаҿы.
Бзыԥ аиҩхааҿы иахьа уажәраанӡа аӡы иагаз атуристка Дариа Манасова лыԥшаара иаҿуп. Аԥсшьаҩы аӡиас Иаӷьа далаҳаит рашәара 6 рзы. Ари шыҟалаз збаз изларҳәо ала, лара аӡы далаҳаит амаакыра змамыз ацҳаҟынтәи.
Риҵатәи амилаҭтә парк аусзуҩцәеи Гагратәии Гәдоуҭатәии аиқәырхаҩцәеи аӡы иагаз атуристка лыԥшаара иаҿуп. Рашәара 7 азы аԥшааҩцәа авертолиот ала аҭыԥ иахаԥраауан.
Уажәы ашьхараҿы асы ахьӡыҭуа, ақәа ӷәӷәаны иахьлеиуа иахҟьаны Бзыԥ аҩхаа аӡиасқәа зегьы ирыцлеит, урҭ акыр иаӷьны илеиуеит, уи аҭагылазаашьа аԥшаарақәа акыр идыруадаҩуеит.
Дариа Манасова лани ланшьа иԥҳаи Аԥсныҟа иааит рашәара 8 рзы. Дара Дариа Манасова аӡы дахьагаз аҭыԥ ахь инеит, дара апсихологцәа аус рыдырулеит.
