АҞӘА, рашәара 16 - Sputnik. 17 тәыла рҟынтәи афотоҭыхыҩцәа Стенин ихьӡ зху аиндаҭлара ашорт-бӷьыц иануп ҳәа аанацҳауеит РИА Новости.
2021 шықәсазтәи алауреатцәа рыхьӡ рыланаҳәеит аиндаҭлара жәларбжьаратәи ажиури. Иреиӷьӡақәаз ралкааразы ажиури 4,5 нызқь усумҭа агәаҭара иахрыжьит.
Ашорт-бӷыц иануп Китаи, Великобританиа, Германиа, Испаниа, Бырзентәыла, Египет, Индиа, Ҭырқәтәыла назлоу 17 тәыла рҟынтәи афотоҭыхыҩцәа. Раԥхьаӡа акәны ашорт-бӷьыц ианылеит Индонезиа, Мексика, Канада рҟынтәи афотоҭыхыҩцәа.
"2021 шықәсазтәи алауреатцәа русумҭақәа ртема ашықәс аҩнуҵҟа ажәабжьтә ҭыжьымҭақәа еилазырхыз хҭысқәоуп – Миннеаполистәи аҿагыларақәа, Африкеи Азиеи аҵыхәтәантәи 25 шықәса рыҩныҵҟа иҟамлацыз аекологиатә рыцҳара – амаҵа ржәылара, COVID-19 апандемиа уҳәа роуп", - ҳәа азгәаҭоуп аиҿкааҩцәа рыпресс-релиз аҿы.
Цәыббрамзазы ирыланаҳәараны иҟоуп Андреи Стенин ихьӡ зху аиндаҭлара иаиааиз, Гран-при занашьахо рыхьӡқәа. Аиндаҭлара иара убасгьы ихацнаркуеит ашықәс нҵәаанӡа адунеи ақалақьқәа рҿы аиааирагаҩцәа рыбжьара ароуд-шоу амҩаԥгара.
Жәларбжьаратәи аинформациатә маҵзура "Россия сегодня" еиҿнакааз Андреи Стенин ихьӡ зху афотожурналистика Жәларбжьаратәи аконкурс хықәкыс иамоуп ҳаамҭазтәи афотожурналистика ауаажәларра разхьарԥшра. Аиндаҭлара – жәларбжьаратәи афотоеилазаара афотожурналистикаҟны ахьыӡ ҿыцқәа ахьаадырԥшуа, астандартқәа ахьдырҿио, иахьышьақәдыргыло ҭыԥ заҵәыкны иҟоуп. Андреи Стенин ихьӡ зху афотожурналистика Жәларбжьаратәи аконкурс мҩаԥысуеит урыстәылатәии жәларбжьаратәии АИХ, аинформациатә маҵзурақәеи афотоеилазаарақәеи рыдгыларала.
МИА "Россия сегодня" афотокорреспондент Андреи дҭахеит Украина, 2014 шықәса нанҳәа 6 рзы Донецктәи Жәлар рреспубликаҟны. 2010 шықәса инаркны 2014 шықәсанӡа Украина, Сириа, Ливан, Египет, Ҭырқәтәыла, Ливиа, Кыргызсҭан уҳәа еиуеиԥшым атәылақәа рҟны Андреи Стенин афотоҭыхымҭақәа ҟаиҵон. Ипрофессионалтә уалԥшьа анагӡараан иааирԥшыз афырхаҵареи агәымшәареи рзы ианашьоуп Агәымшәараз амедал.
