АҞӘА, рашәара 18 - Sputnik. Еилаԥсоу ақәԥара GMC азы Германиа ачемпион Кораи Џьенгиз (Ацыгәба) рашәара 17 азы Ҭырқәтәыла имҩаԥысуаз MMA World Mix Fight ачемпионат аҿы аиааира игеит ҳәа аанацҳауеит Аԥсны аҿари аспорти русқәа рзы Аҳәынҭеилакы.
Кораи ицықәгылоз Важьа Маҷарашьвили ачемпионат алагара минуҭқәак шагыз ақәгылара мап ацәикит.
MMA ақәԥаҩ Кораи Џьенгиз (Ацыгәба) - еилаԥсоу ақәԥаратә ҟазара аспортсмен, аҳәаанырцәтәи аԥсуа диаспора дахаҭарнакуп.
2014 шықәса раахыс ақәԥареи кикбоксинги инапы рылакуп.
MMA ақәԥаҩ Кораи Џьенгиз Ацыгәба - 35 шықәса ихыҵуеит, шьҭрала даԥсыуоуп. 2017 шықәса раахыс MMA аиндаҭларақәа дрылахәуп, 12 қәгылара рҟынтәи фынтә аиааира игахьеит. Дрылахәын German MMA Championship, Hard Fighting Championship атурнирқәа.
Иаб Озҳан Џьенгиз Ацыгәба акыр шықәса Аԥсны еилаԥсоу ақәԥарақәа рзы аидгыла напхгара аиҭон, зых иақәиҭу ақәԥаразы Европа дачемпионын, жәларбжьаратәи акласс ала аспорт азҟаза ҳәа ахьӡ ихын.
