https://sputnik-abkhazia.info/20220521/ikh-naaa-inkhoit-ynt-asovet-eidgyla-afyrkhaa-vitali-popkov-diizhei-100-shysa-it-1039191048.html

"Ихьӡ наӡаӡа инхоит": ҩынтә Асовет Еидгыла Афырхаҵа Витали Попков диижьҭеи 100 шықәса ҵит

"Ихьӡ наӡаӡа инхоит": ҩынтә Асовет Еидгыла Афырхаҵа Витали Попков диижьҭеи 100 шықәса ҵит

Sputnik Аҧсны

Ҩынтә Асовет Еидгыла Афырхаҵа ҳәа ахьӡ ҳарак иаԥсахаз, Аџьынџьтәылатәи аибашьра Ду аветеран Витали Иуан-иԥа Попков 100 шықәса ихыҵра азгәарҭеит ихьӡ зху... 21.05.2022, Sputnik Аҧсны

2022-05-21T09:00+0300

2022-05-21T09:00+0300

2022-05-21T12:03+0300

аԥсны

ажәабжьқәа

https://cdnn1.img.sputnik-abkhazia.info/img/102096/80/1020968014_244:84:2301:1241_1920x0_80_0_0_a563f1bca1851cd070946f759f801e66.png

Саида Жьиԥҳа, SputnikГагратәи 2-тәи абжьаратә школ аҟынтәи 80-ҩык аушьҭымҭацәа Аџьынџьтәылатәи аибашьра Ду иалахәын. Урҭ рахьтә 34-ҩык - 1941 шықәсазы арҭ аҭыӡқәа нзыжьыз ракәын.Витали Иуан-иԥа Попков шьҭрала Москватәин. Иара иҭаацәа 1934 шықәсазы Аԥсныҟа нхара иааит, хықәкыла Гаграҟа. Витали аҭыԥантәи 2-тәи абжьаратә школ далгоит. Рашәарамза 22, 1941 шықәсазы арԥыс Чугуевтәи арра-авиациатә школ дышҭаз иалагоит Аџьынџьтәылатәи аибашьра Ду. Иҩызцәа зегь реиԥш Витали устәи аибашьра дыршьҭуеит. Деибашьуан Калининтәи, Донтәи, 3-тәи Украинатәи уҳәа афронтқәа рҟны. Наҟ-наҟ командаҟаҵаҩс даиуоит 5-тәи агвардиатә ақәхратә авиациатә дивизиа, 3-тәи еилаԥсоу авиациатә корпус, 17-тәи аҳаиртә ар алада-мраҭашәаратәи афронт, иара убас командаҟаҵаҩс даман 5-тәи агвардиа ақәхратә авиациатә ескадрилиа, 11-тәи агвардиатә ақәхратә авиациатә дивизиа, 2-тәи агвардиатә ажәыларатә авиациатә корпус 2-тәи архәҭа 1-тәи Украинатәи афронт аескадрилиа. Витали Попков ԥсыцқьарылеи гәымшәарылеи ирратә уалԥшьақәа ахьынаигӡоз азы ҩынтәны Асовет Еидгыла Афырхаҵа ҳәа ахьӡ ҳаракы ихҵоуп, ианашьоуп "Аџьынџьтәылатәи аибашьра Ду аорден" II-тәи аҩаӡара, "Аеҵәа ҟаԥшь" аорденқәа ҩба, "Киев аҭарцәразы", "Берлин аҭарцәразы", "Прага аҭарцәразы" амедалқәа. Аибашьра аветеран дзыԥсахаз аҳәынҭқарратә ҳамҭақәа даара ирацәаӡоуп.Витали Попков Аџьынџьтәылатәи аибашьра Ду ашьҭахь далгоит Арра-ҳаиртә академиа. Авиациа аинрал-леитенант ичын ихын. 1980 шықәса инаркны Арра-ҳаиртә анџьныртә академиаҟны алекциақәа мҩаԥигон.Асовет Еидгыла ҩынтәны иафырхаҵахаз Витали Иуан-иԥа иԥсҭазаара далҵуеит 2010 шықәсазы. Джуп Москва.Аибашьра аветеран 100 шықәса ихыҵра иазкны агәалашәаратә усмҩаԥгатә аартын ашкол аҩнуҵҟа еиҿкаау Ахьӡ-аԥшеи аџьеи рмузеи аҟны. 67 шықәса раахыс ашкол аҿы аус зуа, Аԥсны зҽаԥсазтәыз арҵаҩы 92 шықәса ирҭагылоу Аделаида Қапԥҳа асасцәа ирзеиҭалҳәеит напхгара зылҭо амузеи аҟны иӡыргоу афотосахьақәа рҭоурыхқәа. Ахәыҷқәа ракәзар, Аџьынџьтәылатә еибашьра Ду иалахәыз рышкол аушьҭымҭацәа рсиа иаԥхьаны рылшарақәа азгәарҭеит."Иҭабуп идуӡӡаны ҳәа шәасҳәар сҭахуп, ҳашкол аҭоурых азы акрзҵазкуа ахҭыс шәхы ахьалашәырхәыз. Витали Попков 50 шықәса ҵуеит ихьӡ ҳаракны иныҟәаҳгоижьҭеи. Иара иеиԥш иҟоу афырхацәа рҿарԥштәы ала еиҵаҳааӡоит абиԥарақәа. 400-нтә зырратә уалԥшьақәа рынагӡаразы иԥырхьаз, 117-нтә хаҭала аӷа иҿагылахьаз, афашистцәа рҳаирпланқәа 41 ҭазырхаз Витали Попков аибашьра цонаҵы иныҟәицоз иҳаирплангьы зны икаҳахьан. Усҟан иара машәыршәа иԥсы еиқәхеит, ихигеит апластикатә ԥҟарақәа фба. Акинорежиссиор Леонид Быков "В бой идут одни старики" аҟны афырхацәа иреиуоу алеитенант Александров данааирԥшуаз Витали Попков ипротатип ихы иаирхәеит. Абас дыҟоуп ҳветеран хьӡырҳәага", - лҳәеит лықәгылараҟны ари амузеи аиҿкааҩцәа иреиуоу Аделаида Қапԥҳа.Анаҩс агәалашәаратә усмҩаԥгатә аофициалтә хәҭа акттә зал аҿы иацҵан. Витали Попков иԥсҭазаареи иеибашьратә мҩеи, ажәеинраалақәеи, ашәақәеи, акәашарақәеи рыла ихарҭәаан ахәылԥаз.Аԥсны аҵарадырреи абызшәатә политикеи рзы аминистрреи, Гагра араион анапхгареи, араионтә Еизареи, Аԥсны иҟоу "Россотрудничество" ахаҭарнакреи, Урыстәыла ашәарҭадаратә маҵзура анапаҵаҟа иҟоу аҳәаахьчаратә усбарҭеи, Аԥсны амчратә еилазаарақәа Рассоциациеи, Гагра араион абыргцәа Рхеилаки, аҵареи акультуреи рыҟәшақәеи уҳәа рҟынтә анапхгаҩцәеи аспециалистцәеи злахәыз агәалашәаратә усмҩаԥгатә аиҿкаашьа ахә ҳаракны иршьеит. Асасцәа еицҿакны ирҳәеит абас еиԥш ацәанырра шьахәқәа рызҭаз аусмҩаԥгатә ааигәа рхы шаладмырхәыцыз. Ашкол адиректор Изабелла Ажьиԥҳаи арҵаҩратә еилазаареи, ахәыҷқәеи иҭабуп ҳәа рарҳәеит ҭакԥхықәрала ари аус иахьазнеиз азы."Ҷыдала сара сзы Аџьынџьтәылатә еибашьра Ду иадҳәалоу ахҭысқәа гәырԥшаагоуп. Избанзар саб Алықьса Абрам-иԥеи сан лаб Сулҭан Давид-иԥа Папбеи ари аибашьра иалахәын. Убри аҟнытә лымҳаҭасла акәымкәа шьала-дала исныруеит уи иацу ахьаа. Сара сгәакьацәа рыԥсы ҭаны ихынҳәит, аха ргәабзиара ианырыз ауадаҩрақәа рныԥшуан. Сыхәҭакахьала ашкол анапхгареи, арҵаҩцәеи, аҵаҩцәеи иҭабуп идуӡӡаны ҳәа шәасҳәоит шәааԥсаразы", - ҳәа азгәалҭеит Аԥсны аҵарадырреи абызшәатә политикеи рзы аминистр ихаҭыԥуаҩ Ада Кәарҷелиаԥҳа.Гагра араион абыргцәа Рхеилак ахаҭарнакцәа, Аԥсны Афырхаҵа Рудольф Алшәындбеи "Агәымшәаразы" амедал занашьоу Анатоли Ҷыҭанааи аибашьцәа ргәалашәара змырӡуа аҿар аџьшьара рырҭеит. Гагра араион аҵара аҟәша аиҳабы Мадина Ажьиԥҳа лықәгылараҟны иазгәалҭеит абиԥара ҿа рааӡараҿы ишхадароу абас еиԥш еиԥш иҟоу агәалашәаратә хәылԥазқәа рымҩаԥгара.Гагратәи 2-тәи абжьаратә школ адиректор Изабелла Ажьиԥҳа лыхәҭакахьалагьы агәалашәаратә хәылԥазы иаҭааз зегьы иҭабуп ҳәа ралҳәеит.Аҵыхәтәаны, Аԥсны иҟоу "Россотрудничество" ахаҭарнакра аҟнытә ашкол ҳамҭас иаҭан ашәҟәқәа. Аԥсны амчратә еилазаарақәа Рассоциациа ахьӡала ашкол адиректори, гәыԥҩык арҵаҩцәеи, аҵаҩцәеи аҳаҭыртә шәҟәқәа ранашьан Ахьӡ-аԥша амузеи еиҿкааны иахьрымоуи уи ахарҭәаара иахьазааԥсои рзы.

https://sputnik-abkhazia.info/20220509/sra-zym-arkha-amiting-akontsert-gagra-araion-any-aiaaira-du-amsh-azgareit-1039027938.html

2022

Ажәабжьқәа

ab_AB

ажәабжьқәа