Урыстәыла ААР абиометриатә тәылауаҩшәҟәқәа рыҭара хацнаркит
© Sputnik / Григорий Сысоев
/ Анапаҵаҩра
Аԥсахрақәа ирыҵаркуеит аҳәаанырцә иҟоу адипломатиатә хаҭарнакрақәеи аконсултә усбарҭақәеи.
АҞӘА, цәыббра 20 - Sputnik. Урыстәыла адәныҟатәи аусқәа рминистрра Аконсултә департамент 10 шықәса ҳәа ҿҳәарас измоу аҳәаанырцәтә биометриатә тәылауаҩшәҟәқәа рыҭара еиҭахацыркхоит. Абри атәы аанацҳауеит аусбарҭа асаит.
"2022 шықәса цәыббра 20 инаркны Урыстәыла ААР асистемаҿ, аҳәаанырцә иҟоу Урыстәылатәи Афедерациа адипломатиатә хаҭарнакрақәа, аконсултә усбарҭақәа налаҵаны 10 шықәса ҳәа ҿҳәарас измоу аҳәаанырцәтә биометриатә тәылауаҩшәҟәқәа рыҭара еиҭахацыркуп", - аҳәоит адырраҭараҿы.
Аусбарҭа иаанацҳауеит атәылауаҩшәҟәқәа рыҭара 2022 шықәса нанҳәа 26 азы иаанкылан атехникатә уадаҩрақәа рзы, уажәы урҭ ауадаҩрақәа аԥыхуп, ирыдкылоуп аҳәаанырцә инхо Урыстәыла атәылауаа арҭ атәылауаҩшәҟәқәа рыҭараз ауснагӡатә цҵақәа.
Абиометриатә тәылауаҩшәҟәы абжьааԥнытәи излеиԥшым уи ауп, уи зтәу изку иаабац адыррақәа рыда, уи иагәылоуп иҷыдоу амикросхема, уи иануп иаҭаху адыррақәа зегьы: ажәла, ахьӡ, абхьӡы, даниз арыцхә, атәылауаҩшәҟәы аномер, уи анрырҭаз арыцхә, аҿҳәара ахьынӡамоу, иара убас егьырҭ адыррақәагьы, анапышьҭақәа убрахь иналаҵаны.
