Микрофон  - Sputnik Аҧсны, 1920
Арадио

Сақаниа ауниверситет аҟны иусуразы: адырра сагәылагылоуп, уи насыԥс исымоуп

Сақаниа ауниверситет аҟны иусуразы: адырра сагәылагылоуп, уи насыԥс исымоуп
Анапаҵаҩра
НовостиTelegram
Абиԥарақәа адыррақәа ахьдырҳауа иреиҳау аҵараиурҭа амилаҭтә ҵарадырраҟны алагалеи ихатә ԥышәеи арадио Sputnik аефир аҟны дрылацәажәеит аҿар реиҵааӡара аус аҟны аџьабаа збахьоу аҟазараҭҵааҩ Сурам Сақаниа.
Аԥснытәи аҳәынҭқарратә университет 90 шықәса ахыҵра инамаданы ауниверситет арҵаҩцәа аҭҵаарадырратә усураҿы рылшамҭақәа рзы, активла аҭҵаарадырра-практикатә усуразы аҳәынҭқарратә ҳамҭақәа "Ахьӡ-Аԥша" аорден III аҩаӡара ранашьоуп: афилософиатә ҭҵаарадыррақәа рдоктор Иван Ҭарба, аҭоурыхтә ҭҵаарадыррақәа рдоктор Валери Бигәаа, аҟазараҭҵааҩ Сурам Сақаниа.
"…Аҵара зҵар зҭаху, асахьа ҭызхыр зҭаху, хымԥада, есымшагьы иҟан, иахьагьы убас ауп. Ус шакәу ҳнарбоит ааигәа имҩаԥысыз арт-пленер. Сынтәа иаҳзааз асахьаҭыхыҩцәа инарывагыланы ҳастудентцәа актәи акурс инаркны аԥшьбатәи-ахәбатәи налаҵаны ирацәаҩны аус руит. Аԥсны уажәы џьара унадыххыланы галереиак аҿы ажәытә ишҭыхуаз уахәаԥшыртә аҭагылазаашьа ҳамаӡам. Агалереиа ашә акуп, уажәшьҭа 30 шықәса ҵырц акгьы агым, аха шықәсык ахь знык-ҩынтә Шәача ицаны , еиуеиԥшым ацәыргақәҵақәеи иара амузеи баны иаауа ыҟоуп. Шықәсқәак раԥхьа Ростов ицақәаз ыҟоуп арҵаҩцәеи гәыԥҩык аҵара зҵои, Краснодар, Москва ицақәаз ыҟоуп. Абас еиԥш рыла иабароуп. Аинтернет аҟны иумбо иҟои, аха зегьы ирыцкуп арҵаҩы дрывагыланы амузеи аҟны аусумҭақәа закәу анырзеиҭеиҳәо. Ишәым ахшыҩ еиуеиԥшым аформақәа анибо, игәы азыҳәаны уи даланагалар ҟалоит, арахьтәи аҵара, адырра дацәхнаҟьоит", - иҳәеит Сақаниа.
Аҟазараҭҵааҩ иазгәеиҭеит арҵаҩратә ус иацу ааԥсара ду ихазыршҭуа акәны ишыҟоу аҿарацәа акы рҵарц, ирдырырц иаадырԥшуа агәаҳәара анибо, убасгьы иҳәеит ихы аус адуларазы арҵаҩратә ус шцхыраагӡоу.
"Саргьы адырра снаҭоит (ауниверситет аҟны аусуразы - азгә.). Иаҳҳәап, рызҵаара аҭак сзыҟамҵаӡакәа саанхар, сҽысшьызшәа исыԥхьаӡоит. Убас иҟамларц азы саргьы сдырра есымша иацысҵоит, исырҿыцуеит. Уи зегьы сзышьҭкаауам, аха адырра сагәылагылоуп, убри ауп насыԥс исымоу ауниверситет аҟны", - иҳәеит Сақаниа.
Аицәажәара инеиҵыхны ишәаҳар шәылшоит аудиофаил аҟны.
Ажәабжьқәа зегьы
0