Аԥшӡара, агьама, агәыкра: иссиру ҳаушьҭымҭацәа

Рашәарамзеи ԥхынгәымзеи ианреимакыроу аушьҭымҭацәа рыхәылԥазқәа ираамҭоуп.

Ашколхәыҷқәа раҳасабала аҵыхәтәантәи рыхәылԥаз ҭакԥхықәрала иазнеиуеит, аамҭа акыр шыбжьоу аҽазыҟаҵара иалагоит, иршәырҵо-ирхарҵо иашьҭалоит.

Аҭыԥҳацәа амодаҿы иҟоу аҵыхәтәантәи аиҭакрақәа ирыцклаԥшуеит, адунеи аҿы еицырдыруа ауаа рышәҵатәы џьашьахәқәа арбақәану ҭырҵаауеит.

Арԥарцәа ракәзаргьы, акала иаҵахом, аӡәырҩы аклассикатә шәҵатәы алырхуеит, аха убри аан аӡәы излаиеиԥшымхаша акы адыргалоит.

Аклассикатә маҭәа зшәызҵо аҭыԥҳацәа рхы-рҿы дырхиоит абжьааԥнеиԥш акәымкәа, голливудтәи аеҵәахәқәа роума уҳәаратәы, урҭ уадаҩрада иреиканыргьы рылшоит.

Аԥсны аԥштәеиқәаҵәа бзиа ирбоит, ишакәхалакгьы, уи уҭнагоит ҳәа иԥхьаӡаны.

Ахьҩежьԥштәи аиқәаҵәеи еидкыланы иушәуҵар еиӷьымзар, еицәам.

Иацы школмаҭәала еибыҭаны партак еицахатәаз ахәыҷқәа иахьа иааузымдырратәы ирызҳаны ҳаԥхьа иаагылеит.

Имаҷҩым иласу, аԥхын ианаалаша ԥшшәыла еибыҭоу арԥарцәагьы.

Даҽа џьоукых реибыҭашьала аҳҭыԥҳацәа угәаладыршәоит.

Маҷӡак аанхеит иацтәи ахәыҷқәа алекциақәа рҿы итәаны, раԥхьатәи асеминарқәа арҭо иалагарц. Аха макьана урҭ рхы иҭоу ишыԥшӡоу ауаа ирбо-ираҳауа, афотоҭыхыҩцәа рҿаԥхьа инаҳәы-ааҳәуа аҽҭыхра ауп.

Абас ала, Аҟәатәи аԥшаҳәа аԥшӡа цәа аҟәнылоит, аҿар рҭаацәа реиԥш, ақалақьуаа зегь ззыԥшу хҭысхоит ари ашықәс аамҭазы.

Азнык азы идухеит ҳәа ҳазхәаԥшуа аҿар уеизгьы рыбла ахәыҷра хыҳәҳәылоит.

Дара зегьы ргәырӷьара рзыҵәахуам. Ақәыԥшра еиӷьу иҟоузеи!

Иаҳҳәозар, зыблагәы аԥшшәы иеиԥшу акьаҿ зшәызҵаз еиҳагьы дыҭнагоит.

Еимгеимцарак иалагӡаны аӡӷаб дҭыԥҳаха даақәгылоит.

Аччаԥшь уҿықәыхх, ублақәа лашо, уԥхашьаԥхаҵо уҟазар -- иреиӷьӡоу афото алымҵыр ауам.

Абласаркьа еиқәаҵәақәа рхаҵаны арҭ арԥарцәа реиԥш аӡәырҩы ԥагьа-ԥагьа аԥшаҳәа иануп.

Арԥарцәа иршәырҵо акостиумқәагь еиуеиԥшымзар ҟалоит. Абар иеихацыркыраха ари ашәҵатәы ҽаӡәы диламҩашьартә дааҟанаҵеит.

Аиаша ҳҳәап, ашкәакәа еиӷьу ԥштәы ыҟам ахаангьы.

Амаҭәа аганахьала арԥарцәа еиҳа ирықәҿиеит, ҽа знык-ҩынтә иршәырҵар рылшоит.

Аҭыԥҳацәа рзы ус иузҳәом. Рыҵкы ԥшӡақәа знык ада ирышәҵаны ицәырҵуам. Иагьа умҳәан, ус ишоуп дара - еснагь аӡә ддыршанхалар цәгьа ирбом.

Арҭ аҷкәынцәа уажәшьҭа аӡӷабцәа ҭыԥ рызымҭоз, рыхцәқәа ирыхоз ракәым, ԥхьаҟа иԥшуа, адунаӡацәа реиԥш зԥеиԥш иазхәыцуа хацәарԥарцәоуп.

Ҳаӡӷабцәа арҭ ахәылԥазқәа рзы агьама ҳаракы шрымоу, убри аан рых пату шақәырҵо аадырԥшуеит.

Иҟоуп зыблақәа, зхаҿсахьа цәажәо ауаа. Иаҳҳәап, абри арԥыс гәаҭалагьы дшылаша-лашо агәра аагоит.

Асмокинги ахьычԥаԥыр-хәдахаҵеи ахаан угәы рыхшәом, егьа аамҭа царгьы амода иалҵуам.

Ажәакала, ари ахәылԥаз арҭ ахьыбҿар ахаан ргәы иҭымҵәо, еснагь иргәалашәало хҭысхоит.