https://sputnik-abkhazia.info/20241201/shaaala-aazarakh-ansambl-nar-zhashysa-akhyit-1053021251.html

"Шьаҿаӷәӷәала аҟазарахь": ансамбль "Нарҭ" жәашықәса ахыҵит

"Шьаҿаӷәӷәала аҟазарахь": ансамбль "Нарҭ" жәашықәса ахыҵит

Sputnik Аҧсны

Асҭамыр Малиа напхгара зиҭо Гагратәи ахәыҷтәы акәашаратә ансамбль "Нарҭ" жәашықәса ахыҵит. Аиубилеитә рыцхә аҳаҭыр азы Гагра имҩаԥган аконцерт. Арахь имҩахыҵит... 01.12.2024, Sputnik Аҧсны

2024-12-01T14:00+0300

2024-12-01T14:00+0300

2024-12-01T14:17+0300

аԥсны

аналитикеи аиҿцәажәарақәеи

https://cdnn1.img.sputnik-abkhazia.info/img/07e8/0c/01/1053023112_0:120:1280:840_1920x0_80_0_0_ece1f783a9ba1413287bab8b8dfd8e6b.jpg

Саида Жьиԥҳа, SputnikАнсамбль "Нарҭ" Асҭамыр Малиа 2014 шықәсазы иаԥиҵеит. Аԥхьанатә ахаԥшьгаратә коллектив Гагратәи абжьаратә школ №4 ахыбраҟны еиҿкаан. Устәи аҽазыҟаҵарақәа абжьаратә школ №2 ахь ииаган. Амилаҭ кәашарахь абзиабара зкыз ахәыҷқәа есышықәса рхыԥхьаӡара иацло иалагеит. Шықәсқәак раахыс аҽазыҟаҵарақәа Гагратәи аҟазаратә школ аҿы имҩаԥысуеит. Ари аамҭа иалагӡаны ансамбль "Нарҭ" Аԥсни Урыстәыла арегионқәеи рҟны имҩаԥысуаз еиуеиԥшым афестивальқәеи аконкурсқәеи рҿы аԥхьахәтә ҭыԥқәа ирыԥсахахьеит. Иахьа Асҭамыр Малиа иарӷьажәҩаны ивагылоу абалетмеистер Ҭемыр Џьниеи, акостиумқәа реиқәыршәаҩцәа Ирма Барганџьиаԥҳаи Оксана Гьерхьелиаԥҳаи, аҭаацәеи рыбзоурала, аколлектив шьаҿаӷәӷәала аҟазара амҩа ду ианылеит. Ҭаацәак еиԥш еизыҟоу "Нарҭаа" еибаркны измоу реизыҟазаашьа ауп."Схәыҷқәа ари ансамбль иалоуижьҭеи сынтәа ԥшьышықәса ҵуеит. Асҭамыр Малиа убриаҟара иҟазшьа бзиоуп, рҩыза еиҳабы иеиԥш ауп дшырзыҟоу. Ҳхәыҷқәа игәра ргоит, бзиа дырбоит, абарҭ аизыҟазаашьақәа роуп иахьа ирымоу аихьӡарақәагьы зыбзоуроу. Ансамбль "Нарҭ" аԥсуа культура ахәышҭаара иагымзааит, ахәаԥшцәа рыбзиабареи рыԥхарреи рыцзааит. Саргьы исылшо зегь ҟасҵоит ацхыраара арыҭаразы", - лҳәеит аколлектив гәыкала иазыҟоу ан, ансамбль костиумла реиқәыршәараҿы аҭакԥхықәра зду Оксана Гьерхьелиаԥҳа.Ансамбль иалоуп 70-ҩык рҟынӡа акәашацәа. Урҭ еихшоуп аиҳабыратәи, аиҵбыртәи агәыԥқәа ҳәа. Иҟоуп асценахь инарымгац ахәыҷқәа ахьазыҟарҵо астудиагьы.Ансамбль "Нарҭ" аиубилеитә концерт ахь имҩахыҵыз Гагра араион ахада ихаҭыԥуаҩ Хана Гәынԥҳа аколлектив араион ахада Иури Хагәышь ихьӡала дрыдныҳәалеит, ирзеиӷьалшьеит еиҳау аихьӡарақәа. Гагра араионтә еизара адепутатцәа рыхьӡала, Асҭамыр Малиеи акәашацәа кәыԥшцәеи рҟазара ахә ҳаракны ишьо раԥхьаҟа аманшәалара рзеиӷьеишьеит Аизара ахантәаҩы ихаҭыԥуаҩ Дауҭ Ақаҩба. Рыхьӡалагьы аколлектив аԥаратә ҳамҭа анаишьеит. Араион Ахадара акультура аҟәша ахьӡала, Гаграа рыхьӡырҳәагақәа аџьшьара риҭеит акультура аҩны аиҳабы Дмитри Ԥиԥиа, иаргьы рыҟәша ахьӡала ансамбль аԥаратә ҳамҭа аиҭеит. Дмитри Ԥиԥиа иҟазара абзиабаҩцәагьы ҳамҭада иаанымхеит. Иара ирзынаигӡеит иашәа хаақәа.Ансамбль "Нарҭ" асценахь иааицԥхьаӡа ахәаԥшцәа дыргәырӷьон аццышә зхылҵуаз рыкәашарақәа рыла. "Нарҭаа" ари амш ргәы хыҭ-хыҭуа иазыԥшын. Абжьааԥны, аконцертқәа раан акы-ҩба номер акәызтгьы инарыгӡоз, уажәы рхатәы иубилеитә концерт аҟны алшара рыман ҳәаада рҟазара аарԥшра. Аҿарацәа инарыгӡеит "аԥсуа кәашара", "аварцәа рыкәашара", "анхацәа рыкәашара", "ауаԥсаа рыкәашара", "аҭыԥҳацәа рыкәашара" уҳәа. Артистцәа хәыҷқәа асцена анаанрыжьуазгьы асасцәа рнапеинҟьабжь еихысӷьуамызт.Ҷыдала иалкаатәуп акостиумқәагьы. Урҭ ҿыц иӡахын. Аҭыԥҳацәа рыцкқәа акалашәа убла хыркуан. Еилаарцыруа амра ашәахәақәа реиԥш асцена иқәԥхон."Ҳара иахьа ҳгәахәтәы наӡеит. Аконцерттә зал ахь иааз зегьы ҳахәаԥшцәа роуп. Уи еиҳау аҳамҭа ыҟам ҳара ҳзы. Аҭагылазаашьа ҳхы иархәаны, ҳнапхгаҩы Асҭамыр Малиа иҭабуп ҳәа иаҳҳәар ҳҭахуп аԥсуа культурахь ҳахьымҩахигаз. Ҳаԥхьаҟа аӡәыр аҟазара ҳҽадаҳҳәалар ҳҭаххаргьы, ашьаҭа бзиа ҳамоуп", - рҳәеит ансамбль аиҳабыратәи агәыԥ алахәцәа.Рҩызцәа ирыдырныҳәаларц Аҟәанатәи иааит, Аԥсны зҽаԥсазтәыз артист Еснаҭ Сангәлиа напхгара зиҭо ансамбль "Адаулгьы". Дара рықәгылара акәзаргьы ахәаԥшцәа лассамҭа ирхашҭуам."Асҭамыр Малиа сҩыза бзиа иоуп. Инапы злаку аус ахә ҳаракны исшьоит. Иареи сареи изныкымкәа агастрольқәа рахь ҳаиццахьеит. Даара узықәгәыӷша хореографуп. Ивагыло иҩызцәагьы иаргьы иахьа иалырхыз аҟазаратә мҩа хара ишнанаго убартә иҟоуп. Ахәыҷқәа ракәзаргьы рыбла амцабз ахубаалоит. Уи даара ихадароуп артист изы", - иҩызеи аколлективи дрыдныҳәало иазгәеиҭеит Еснаҭ Сангәлиа.Ахәылԥаз иалагӡаны асценаҟны инеины ажәа зҳәоз рацәаҩын. Иӡбахә сымҳәар ҟалом ҷыдала аконцерт збарц иааз Шәачатәи аԥсуаа Рхеидкыла ахантәаҩы Богдан Ҳагба. Дара зегьы ирҳәоз ак акәын, - "Асҭамыр-Аферым, ԥхьаҟа".Асҭамыр Малиа аиубилеитә хәылԥазы иаҭааз зегьы иҭабуп ҳәа раҳәо, еснагь иколлектив адгылара азҭо, аҿиара иацхраауа аџьшьара риҭеит. Инаҵшьны иазгәеиҭеит, Гагра араион анапхгареи акультура аҟәшеи рџьабаа атәы.Асҭамыр Малиа ихаҭа ирҿиаратә мҩа Гагрантәи, Нури Гәынба напхгара зиҭоз акәашаратә ансамбль "Агәаԥшь" аҟнытә иалагеит. Устәи шьаҿа-шьаҿа аҳәынҭқарратә ансамбль "Кавказ" аҟынӡа днаӡеит. Аха аконцертқәа руак аан Асҭамыр ишьамхы ааха аиуит. Уи нахыс иҽазикит арҵаҩратә ус. Ишиқәманшәалахазгьы ҩаԥхьа агәра ҳгеит. Асҭамыр Малиа ианашьоуп хыԥхьаӡара рацәала акультуратә хырхарҭа змоу аҳамҭақәа.Сынтәатәи ашықәс иалагӡаны, ансамбль "Нарҭ" ҩынтә иреиҳау аҳамҭа "Гран-при" иаԥсахеит. Краснодар атәылаҿацә Лазаревское иара убас Москва еиҿкааз афестивальқәа рҟны. Иааиуа ашықәс азы дара ааԥхьара рымоуп мшаԥымзазы Казань имҩаԥысраны иҟоу афестиваль ахь.

https://sputnik-abkhazia.info/20160201/1017043965.html

https://sputnik-abkhazia.info/20191107/Gagrati-alitsei-internat-ansambl-Moskvati-afestival-ay-aiaaira-ageit-1028771744.html

2024

Ажәабжьқәа

ab_AB

аналитикеи аиҿцәажәарақәеи