Sputnik амчыбжь: Кириенко иусуратә ҭаара, Аԥсны ЕАР афорум аҿы, ашьапылампыл
© Sputnik / Томас Тхайцук
Анапаҵаҩра
Аинформациатә маҵзура Sputnik Аԥсны есымчыбжьеиԥш иазнархиеит ԥхынҷкәын 1-7 рзы ареспубликаҿы имҩаԥысыз акыр зҵазкуа ахҭысқәа рыхҳәаа.
Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко ареспублика иусуратә ҭаара, Аԥсны пхада Бадра Гәынба дицны дызҭааз аҭыԥқәа, аиԥыларақәа рҿы излацәажәаз, ЕАР аҿы Аԥсны иадгылан иқәгылаз, Владимир Путин данҭаха ашьҭахь "Агәымшәараз" аорден занеишьаз аматериал аҿы.
Аусуратә программа
Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко Аԥсныҟа иҟазаара апрограмма акыр амҽханакуан. Ареспублика ахада Бадра Гәынба дицны иара имаҷымкәа аобиектқәа дырҭааит, еиликааит аремонт-еиҭашьақәыргыларатә усурақәа шымҩаԥысуа, иара убас, Урыстәылатәи афинанстә цхыраара ала иаздырхио акоммерциатә обиектқәа раартра шымҩаԥысуа.
Урҭ рхыԥхьаӡараҿы иҟан: Аҟәатәи амшын аԥшаҳәа, Аҳабла ҿыц аҿы абаҳча маҷ, "Аԥснытәи ацитрустә еилахәыра", Мықә ақыҭантәи апроект "Агәабзиаратә маршрутқәа". Урҭ, иара убас, Амҳаџьырқәа рыԥшаҳәаҿы имҩаԥгаз агастрономиатә фестиваль иаҭааит. Арҭ ахҭысқәа зегьы ҟалеит абҵарамза аҵыхәтәантәи амш аҽны.
Ԥхынҷкәынмза хацыркхеит Нестор Лакоба иҭоурых-мемориалтә музеи аҭаарала. Уи макьаназы ҩнымаҭәалеи цәыргақәҵатә маҭәахәылеи еиқәыршәаӡам.
"Сгәы иаанагоит, ари амузеи аҿы Нестор Аполлон-иԥеи, уи иҭаацәареи, иполитикатәи иуаажәларратәи усуреи угәалазыршәо аматериалқәеи аекспонатқәеи рацәаны иҟалоит ҳәа", азгәеиҭеит Аԥсны ахада.
Убри аҽныҵәҟьа Синоп иаатит аспорттә фестиваль "Аԥсуа ҳәаа". Ари ахҭысгьы Гәынбеи Кириенкои хаҭалатәи азҿлымҳара арҭеит.
Урҭ, иара убас, Адунеизегьтәи аҿар рфестиваль Адирекциа Ахаҭарнакра иаҭааит. Ачынуаа акампус, аковоркинг, аԥсшьарҭа ҭыԥқәа дырбан, аусмҩаԥгатә шымҩаԥысуаз атәы рзеиҭарҳәан.
Кириенко ицара аламҭалаз Аԥсуа телерадиоеилахәыреи Абаза-ТВ-и аинтервиу риҭеит, уаҟа Урыстәылеи Аԥсни реизыҟазаашьақәеи, аполитикатә ҭагылазаашьеи, аусеицура аҿиара иазку азԥхьагәаҭақәеи ирызку азҵаарақәа рҭак ҟаиҵеит, иахьазы актуалра зҵоу атемақәа рзы игәаанагарақәа иҳәеит.
Аенергетикеи аицыпроектқәеи
Аҳәынҭқарра ахада ипресс-маҵзура излаанацҳауа ала, ԥхынҷкәын 1 азы Гәынбеи Кириенкои рылацәажәеит афымцамҩангагақәа реиҭарҿыцреи Аԥсны фымцамчла аиқәыршәара аҭышәынтәалареи рзы аусмҩаԥгатәқәа, иара убас, аҩганктәи аусеицуреи еицырзеиԥшу апроектқәа рынагӡареи ртәы.
Аҳәынҭқарра ахада ҷыдала дазааҭгылеит Мықә ақыҭан ицәыргаз апроект "Агәабзиара амаршрутқәа".
"Сгәанала, Аԥсны мрагыларатәи ахәҭа аҿиара акырӡа аҵанакуеит. Ас еиԥш ахҭысқәа, хымԥада, атәыла мрагыларатәии мраҭашәаратәии ахәҭақәа рыбжьара абаланс ҟарҵоит, иааизакны ҳтуристтә индустриа аҿиаразы аҭагылазаашьақәа аԥырҵоит", - иҳәеит Бадра Гәынба.
Сергеи Кириенко даҽазныкгьы иазгәеиҭеит, Аԥсны аекономика иахьынӡалшо ала ахалахныҟәгара аизырҳара еицырзеиԥшу аусмҩаԥгатәқәа рхықәкқәа ишреиуоу.
"Ари ус мариам, аха иҳаҩсыз шықәсыбжак ала, ҳара иаабоит абиуџьет ахашәалахәы 30% рҟынӡа ишеизҳаз", - ҳәа азгәеиҭеит иара.
Алиса Гыцԥҳа лиубилеи
Бадра Гәынба Алиса Гыцԥҳа лиубилеи лыдиныҳәалеит.
"Шәара шәбаҩхатәра ду, еицакра зқәым асценатә гәамч, аҟазарахь ишәымоу агәбылра акыр шықәса раахыс Аԥсни уи анҭыҵи ахәаԥшҩцәа хнахуеит. Шәара асценахь шәцәырҵра агәбылреи, ацәанырра ҳаракқәеи, аҟазара дуи рыла иҭәу хҭысны иҟалоит", — аҳәоит адныҳәалараҿы.
Бадра Гәынба иазгәеиҭеит Алиса Гыцԥҳа атәылеи ажәлари ззыгәду дшыруаӡәку. Илзеиӷьасшьеит агәабзиара, ахирра, агәеизҳара, арҿиаратә гәазыҳәара.
Аибашьҩы наӡаӡа абзиараз ҳәа иаҳәара
ԥхынҷкәын 2 рзы Аԥсны ахада Бадра Гәынба дрыдышшылеит иҷыдоу арратә операциаҿ иҭахаз аибашьҩы Гурген Григориан иҭаацәа.
Аибашьҩы аҵыхәтәантәи имҩахь днаскьаргеит Гәылрыԥшь араион Ԥарнаут ақыҭан.
Алахьеиқәҵаратә церемониа иалахәын ахада ихаҭыԥуаҩ Беслан Бигәаа, аԥыза-министр Владимир Делба, аиҳабыра рлахәылацәа, Гәылрыԥшь араион ахада и.н. Саид Ҳаразиа.
Данҭаха ашьҭахь аорден
Урыстәыла ахада Владимир Путин иусԥҟала арратә операциа ҷыда азонаҿы иҭахаз Баҭал Бигәаа "Агәымшәараз" аорден ианашьоуп.
Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко аибашьҩы иҭаацәа аҳәынҭқарратә ҳамҭа риҭеит.
Бадра Гәынбеи Сергеи Кириенкои иахьа Баҭал Бигәаа инышәынҭраҿ ашәҭшьыҵәрақәа шьҭарҵеит.
Бигәаа абаталион "Пиатнашка" далахәны еиуеиԥшым ахырхарҭақәа — Авдеевка, Часов-Иар, Курсктәи аобласт, уҳәа егьырҭ аҭыԥқәа рҿы деибашьуан.
Акадастр аамҭала иаанкылоуп
Аҳәынҭқарра-зинтә политиказы Апарламенттә еилакы абжьгара ҟанаҵеит 2027 шықәса ԥхынгәымза 1 аҟынӡа "Еиҭамҵуа амазара акадастр азы" азакәан амч аанкыларазы азакәан апроект актәи аԥхьарала ирыдыркыларц.
Дауҭ Хәытаба ихантәаҩрала Аԥсны Жәлар Реизараҿ аилак аилатәара мҩаԥысит ԥхынҷкәын 2 рзы.
Авторцәа ргәаанагарала, аиҭакрақәа ралагалара хымԥадатәиуп, избанзар, акадастр азы азакәан аԥҟарақәа ҳазҭоу аамҭазы инҭырҳәцааны инарыгӡаӡом.
Анапхгара рҽеизгареи аҽазыҟаҵарақәа рыцҵареи
Ԥхынҷкәын 5 рзы Аԥсны Арбџьармчқәа рыдҵаҟаҵаҩ хада Бадра Гәынба днеит Атәылахьчара аминистрра аполигон ахь.
Арбџьармчқәа рыштаб хада аиҳабы Владимир Савченко ахада адырра ииҭеит аиҳабацәа алархәны аоператив-ҽеизгаратә ҽазыҟаҵарақәа рзы аусмҩаԥгатәқәа шцо.
Аԥсны атәылахьчара аминистрра анапхгаратә еилазаара аоператив-мобилизациатә еизара мҩаԥысит ԥхынҷкәынмза 1 азы ихацыркыз аҵарашықәс ҿыц алагара аҳәаақәа ирҭагӡаны. Уи далахәын ахада ихаҭыԥуаҩ Беслан Бигәаа.
Аԥсны АдәАР аҟны аиԥылара
Адәныҟатәи аусқәа рминистр Олег Барцыци Ҭырқәтәыла иҟоу аԥсуа культуратә хеилакқәа рфедерециа ахантәаҩы Иауз Аҭрышбеи еиԥылеит.
Адәныҟатәи аусқәа рминистр Аҭрышба идиныҳәалеит аҭакԥхықәра ду зцу ари амаҵураҭыԥ ахь иалхра.
"Ҳаҭыр зқәу ҳашьа, Иауз Аҭрышба ари амаҵураҭыԥ идысныҳәалар сҭахуп. Аԥсны жәлар Рџьынџьтәылатә еибашьраан иуаажәлар рыгәҭа дышгылаз еиԥш, арҭ инапынҵақәа рынагӡараҿгьы дшаҵамхо агәраганы сыҟоуп", — иҳәеит Барцыц.
Аҭрышба Барцыц иҭабуп ҳәа иеиҳәеит. Ҭырқәтәыла инхо аԥсуааи рҭоурыхтә ԥсадгьыли реимадара арӷәӷәаразы аринахысгьы аусура дшазхиоу азгәеиҭеит.
Амиграциатә маҵзураҿы аилагарақәа
Арратә прокуратуреи Афинансқәа рминистрреи Аҳәынҭқарратә миграциатә маҵзура аусураҿы аилагарақәа шьақәдыргылеит, ҳәа аанацҳауеит Аԥсны апрокуратура Хада.
Аҳәынҭқарратә миграциатә маҵзура амиграциатә хылаԥшра Аусбарҭақәа русураҿгьы агхақәа аарԥшын раионқәак рҿы.
2024 шықәса алагамҭа инаркны 2025 шықәса ԥхынгәымза анҵәамҭанӡа амиграциатә, абиуџьеттә, ашәахтә уҳәа егьырҭ азакәанԥҵарақәа рықәныҟәара гәаҭан.
Амиграциатә маҵзура абжьгарақәа азыҟаҵоуп, амаҵзура аусура аиӷьтәреи, алеишәа арӷәӷәареи, ԥхьаҟатәи аилагарақәа рыԥхьырҟәҟәаареи рзы аусмҩаԥгатәқәа рымҩаԥгара шхымԥадатәиу азы.
Аԥсны абжьы ЕАР аҿы
Аԥсны атәылауаа рзинқәа реилагара Женева имҩаԥысуаз Еиду Амилаҭқәа Реиҿкаара Афорум 18-тәи аилатәараҿы иалацәажәеит, ҳәа аанацҳауеит ареспублика адәныҟатәи аусқәа Рминистрра.
Ҭырқәтәыла иҟоу Кавказтәи Ассоциациақәа Рфедерациа ахаҭарнак Ельчин Аӡынԥҳа иарбоу апроблема иазхьалырԥшит.
Уи инаҵшьны иазгәалҭеит, адунеи атәылақәа жәпакы рҿы Аԥсны иатәу адокументқәа шрыдрымкыло, иара убасгьы иазгәалҭеит атәылауаҩшәҟәқәа разхаҵара ахьыҟам инамаданы, зықьҩыла Аԥсны ауааԥсыра атәыла анҭыҵҟа ацара шрылымшо.
Ҭырқәтәыла иҟоу Кавказтәи Ассоциациақәа Рфедерациа ахаҭарнак адунеизегьтәи ауаажәларра иргәалалыршәеит, Аԥсны ирыҭо аусшәҟәқәа разхамҵара атәыла ауааԥсыра рзинқәа шеиланаго, урҭ аныҟәара, агәабзиарахьчара, аҵарадырра рзы алшара шрымам.
Ашьапылампылтә мчыбжьы
Ашьапылампыл азы "Динамо Ахраҿа" агаразы VII есышықәсатәи атурнир Никита Симониан игәалашәара иазкны иаатит ииасыз амчыбжь азы. Уи еиҿыркааит ашьапылампылтә клуб "Динамои" "Росенергоатоми".
Ахәмарра акомандақәа ааба рхы аладырхәит: "Динамо, "Зенит", очамчыратәи "Ерцахә", "Иунити", "Гәдоуҭа", агәӡератәи "Девиатка", шәачатәи "Алмаз".
Шәачатәи "Алмаз" "Динамо Ахраҿа" аҿы аиааира агеит.
Афиналтә еиндаҭлараҿы урыстәылатәи асасцәа 0:2 ҳәа Аҟәатәи акоманда "Динамо" иаиааит.
Ԥхынҷкәын 5 рзы астадион ҭәны еизызгаз ахәмаррақәа иреиуахеит Урыстәылатәи ашьапылампылтә милаҭтә лигеи Амедиалигеи Аҟәа реицыхәмарра.
4:1 ҳәа аиааира агеит Амилаҭтә лига.
Амилаҭтә шьапылампылтә лигеи Амедиалигеи реицыхәмарраҿы иреиӷьу ахәмарҩыс далкаауп Лука Багаҭелиа. Амилаҭтә шьапылампылтә лига иаланы ихәмаруаз Никита Чагров иреиӷьу амбахьчаҩ ҳәа далкаахеит.
