Асыԥса аҩаӡареи аԥхарра аҳаракыреи гәазҭо адатчикқәа ықәдыргылеит Риҵатәи аҳәырԥсарраҿы
17:36 13.01.2026 (ирҿыцуп: 19:15 13.01.2026)
© Foto / Рицинский Нацпарк
Анапаҵаҩра
АҞӘА, ажьырныҳәа 13 — Sputnik. Асыԥса аҩаӡареи аԥхарра аҳаракыреи рҽеиҭакра гәазҭо адатчикқәа ркомплекс Риҵатәи амилаҭтә ҳәырԥсарраҿы иқәдыргылеит ҳәа Sputnik акорреспондент изеиҭеиҳәеит аҳәырԥсарра аҭҵаарадырратә ҟәша аусзуҩ Ҭемыр Тәанба.
Уажәы аҳәырԥсарра аҵакыраҿы аус ауеит асшәага, уи иаҳнарбоит асы аҳаракыра, ақәыԥшылара аԥхарра, асы ажәпараҿы аԥхарра. Иара убасгьы аусура мҩаԥысуеит асеисмологиатә датчики илаҟәу алассы-лассрақәа рмикрофони рышьаҭала асыԥса алеира агәаҭараз амодуль аԥҵаразы. Абарҭқәа зегьы иалдыршоит асыԥсақәа рлеира разԥхьагәаҭара.
"Сара асы иахьынӡацлои асы анлеиуа иҟоу аԥхарреи срышьклаԥшуеит. Аԥхьаҟа, асыԥса агәаҭараз амодуль анышьақәҳаргылалак ашьҭахь, асыԥса алеира аамҭа ҳашьклаԥшлоит. Асшәагақәа ишьақәдыргылоит иааҳакәыршаны иҟоу аԥсабареи асы аҩнуҵҟеи аԥхарра, ацәаакыра, асы аизҳара. Иааидкыланы арҭ адыррақәа зегьы серверк ахь еизаагоит. Ҳара асыԥса алеира азгәаҳҭоит иалкаау аметеоҭагылазаашьақәа раан. Ари асервер аҿы иазыҟаҵоу анеироҳа арҭ адыррақәа зегьы аус рыднаулоит, аринахысгьы аиԥш зеиԥшу аҭагылазаашьақәа ҟалозар, асыԥса алеира заа иазыԥхьагәаҳҭар алшоит", — ҳәа ҳаилиркааит Тәанба.
Уажәы амилаҭтә ҳәырԥсарра аҭҵаарадырратә ҟәша аусзуҩ адатчикқәа равтономтә версиа аус адиулоит, урҭ амра апанельқәа рҿы иахьыҟазаалакгьы, GSM-сигнал ахьыҟам акәзаргьы, аус рулоит. Асистема зегьы арадиоеимадарала аус аулоит.
Тәанба иажәақәа рыла, адатчикқәа иҟаҵәҟьоу аамҭа арежим ала аҳәырԥсарраҿы иҟоу аҭагылазаашьа ашьклаԥшра иацхраауеит.
Иахьа Риҵа асоура иаҿуп, ажьырныҳәа 13-14 руха ахьшәашәарақәа ирзыԥшуп. Хара имгакәа, аспециалист ишазыԥхьагәеиҭо ала, аҳауа лаҟәыр, асыԥсақәа рлеиразгьы ашәарҭара лаҟәуеит.
Иахьа Риҵа асоура иаҿуп, ажьырныҳәа 13-14 руха ахьшәашәарақәа ирзыԥшуп. Хара имгакәа, аспециалист ишазыԥхьагәеиҭо ала, аҳауа лаҟәыр, асыԥсақәа рлеиразгьы ашәарҭара лаҟәуеит.
