Бадра Гәынбеи Сергеи Кириенкои В.Г. Арӡынба ихьӡ зху жәларбжьаратәи аҳаирбаӷәаза "Аҟәа" аҭоурыхтә терминал аҿы аусутә еиԥылара мҩаԥыргеит.
Бадра Гәынбеи Сергеи Кириенкои В.Г. Арӡынба ихьӡ зху жәларбжьаратәи аҳаирбаӷәаза "Аҟәа" аҭоурыхтә терминал аҿы аусутә еиԥылара мҩаԥыргеит.
Аԥсны ахада иҳәеит Урыстәыла ацхыраарала аҳаиртә баӷәаза атерминалқәа ҩба раартра атәыла аҿиараҿы аамҭа ҿыцны ишиԥхьаӡо.
"Ари ииашаҵәҟьаны ихәҭа ҿыцуп, ҳтәыла аҿиараҿы аамҭа ҿыцуп, Урыстәыла ахада Владимир Владимир-иԥа Путин иҟаиҵаз аӡбара ада уи ҟалашьа амаӡамызт. Сара издыруеит, иахьа шәара ишәыцны ишааз хыԥхьаӡара рацәала аекспертцәеи, аусдкылаҩцәеи, арегионқәа рнапхгаҩцәеи – ҳара ҳзы арҭ аимадарақәа ҳҳәынҭқаррақәа реизыҟазаашьақәа рырӷәӷәаразы даара акраҵанакуеит", — ҳәа иҳәеит Гәынба.
Аԥсны ахадеи Урыстәыла ахада Иусбарҭа аиҳабы актәи ихаҭыԥуаҩи алацәажәеит аԥсуа-аурыс усеицура ихадоу ахырхарҭақәа, уахь иаҵанакуеит асоциалтә, аекономикатә, аинфраструктуратә усхкқәа рҿы еицырзеиԥшу апроектқәа рынагӡара ҳәа аанацҳауеит атәыла ахада ипресс-маҵзура.
"Жәаҳәарада, Урыстәылаахада иҟаиҵаз аӡбара, иареи шәареи шәеиԥылара алҵшәақәеи, аиқәшаҳаҭрақәеи, ҳусеицура аҿиара иацхраауеит. Владимир Владимир-иԥа ари хылаԥшра аиҭоит, иара изы Урыстәылеи Аԥсни рыбжьара аусеицура аҿиара зегь раԥхьаӡа иргыланы аԥыжәара аиҭоит", — ҳәа иҳәеит Сергеи Кириенко.
Иара иҳәеит, иахьа Бадр Гәынба иҭоубашьҭаҵара шықәсык шахыҵуа, насгьы иазгәеиҭеит, ари ашықәсаз ареспублика акыр аҽшаԥсахыз, "аха аԥхьаҟа макьана амҩа хара ыҟоуп, мҽхакы ҭбаалатәи аиҭакрақәа уажәоуп ианалагаз", — ҳәа иҳәеит иара.
Аганқәа, ҳазҭоу аамҭазы Аԥсны имҩаԥысуа Жәларбжьаратәи аекономикатә форум алҵшәақәа хымԥада иубарҭоу, насгьы хара имгакәа ишыҟало азы агәрагара шрымоу азгәарҭеит.
