АҞӘА, хәажәкыра 31 - Sputnik. Урыстәыла Адәныҟатәи аусқәа рминистр Сергеи Лавров аҳәамҭа ҟаиҵеит урыстәылатәи аруаа Венесуелаҟа рнеира азакәан шьаҭа амоуп ҳәа. Аруаа уахь рнеира хықәкыс иамоу арратә техника анагароуп ҳәа аанацҳауеит РИА Новости, ателеканал "Россия-1" адыррақәа ҵаҵӷәыс иганы.
"Ҳара имӡакәа иаҳҳәоит ҳаруаа уахь рнеира ҵаҵӷәыс иамоу – арратә техника амаҵ ауроуп. Венесуелеи ҳареи абри аганахьала уаанӡагьы аиқәшаҳаҭрақәа ҳабжьаҳҵахьан, венесуелатәи апарламент аратификациа азнаухьан. Ҳар уа рыҟазаара Венесуела аконституциа иақәшәоит", - иҳәоит Лавров.
Уаанӡа ЕАА рхада Дональд Трамп Урыстәыла Венесуелантә иқәҵырц адҵа ҟаиҵахьан.
Венесуелатәи АИХ-қәа рдыррақәа рыла, Каракасҟа инеиз аруаа рхыԥхьаӡара 99-ҩык ыҟоуп. Аҳаирпланқәа инаргеит 35 тонна аидара.
Ажьырныҳәа 21 рзы Венесуела иахьатәи ахада Николас Мадуро иҿагыланы Каракас ақәгыларақәа ирылагеит. Апарламент ахада Хуан Гуаидо ажьырныҳәа 23 рзы атәыла ахадас ихы рылеиҳәеит.
Усҟан Гуаидо истатус адгылара арҭеит ЕАА, Канада, Аргентина, Бразилиа, Чили, Колумбиа, Коста-Рика, Гватемала, Гондурас, Панама, Парагваи, Перу, Қырҭтәыла.
Москвеи Каракаси русеицура иацырҵоит, ЕАА уи ишаԥырхагоугьы>>
Урыстәыла Мадуро адгылара инаҭоит аконституциатә шьаҭа зманы иҟоу атәыла ахадак иаҳасаб ала.
Трамп: Венесуела арратә интервенциа аҭыԥ аиур алшоит>>
Европатәи атәылақәа зеижә: Испаниа, Португалиа, Германиа, Великобританиа, Даниа, Нидерланды, Франциа, Венгриа, Австриа, Финлиандиа, Бельгиа, Лиуксембург, Чехиа, Латвиа, Литва, Естониа, Польша, Швециа, Хорватиа, Македониа, Румыниа - жәабран 4 рзы рнапы еицаҵарҩит адекларациа, уа иазгәарҭеит Хуан Гуаидо аамҭалатәи Венесуела ахада ҳәа дшазхарҵо.