Sputnik амчыбжь: аԥхынтәи аԥсшьараамҭа аҽазыҟаҵара, алхрақәа, аӡазы ашәахтә ацҵара

Рашәара 6 рзы Аԥсны ахада Аслан Бжьаниа аусураҟынтә ԥсшьара дахьыҟаз дхынҳәит. Рашәара 8 рзы Аԥсны ахада Аслан Бжьаниа аԥхынтәи аԥсшьараамҭа аҽазыҟаҵара иазку аилацәажәара мҩаԥигеит араионқәа рхадацәеи аҳәынҭқарратә усбарҭақәа рнапхгаҩцәеи алархәны.

Аԥсны атуризм аминистр Ҭеимураз Хышба ари здиҳәало адунеи аҿи Урыстәылеи ишьақәгылаз аҭагылазаашьа ауп. Убри аан, Хышба идыррақәа рыла, атәылаҿы аԥхынра аламҭалаз аԥсшьаҩцәа рнырхарҭақәа рхыԥхьаӡара иацлеит. Уажәы Аԥсны иҟоуп 683 аԥсшьаҩцәа рнырхарҭақәеи 36591 иара-ҭыԥи.

Хышба ишиҳәаз ала, уи ахҟьоит афатәқәа рыхә иахьацло. Бжьаратәла азеиԥш крыфарҭаҿы 500-700 мааҭ шәатәуп, акаҳуажәырҭаҿы - 1700 мааҭ рҟынӡа, ақьафурҭақәа рҿы - 2500 мааҭ.

Аԥсшьарахь иҟаз амилициа аусзуҩцәа аусурахь ирхынҳәын аԥхынразы аус рурацы. Уи адагьы, амилициаа шьапылеи автомашьыналеи амҩақәа рҿы агәҭарақәа мҩаԥыргалоит, аԥсшьаҩцәа еиҳарак изҭаауа аҭыԥқәа рҿы ахылаԥшра дырӷәӷәоит.

Аԥсны агәабзиарахьчара аминистр Едуард Быҭәба аҳәамҭа ҟаиҵеит ахәшәтәырҭақәа аԥхынтәи аԥсшьараамҭа иазыхиоуп ҳәа – ааигәа иаахәан ацхыраара лас амашьынақәа быжьба, амедусҳәарҭақәа иахәҭоу ахәшәқәеи амаругақәеи рыла еиқәыршәоуп.

Ачымазцәа рхыԥхьаӡара анеизҳауа аамҭазы, иаҭахханы иҟалар, аҳақьымцәа ргәыԥқәа дәықәҵахоит Гагреи Пицундеи рмедусҳәарҭақәа рахь.

Асабша рашәара 11 рзы Аԥсны Жәлар Реизарахь иалырхуан 8-тәи (Алашарбагатәи) алхратә ҭыԥ хадаҟынтәи адепутатцәа. Апарламент ахь иқәгылан ҩыџьа акандидатцәа - Леон Гәбази Наур Нарманиеи.

Алхрақәа рылҵшәақәа рыла, апарламенттә алхрақәа аҩбатәи ртур аҿы аиааира игеит Наур Нарманиа.

Амҽыша рашәара 12 рзы Аҟәатәи ақалақьтә еизарахь аиҭалхрақәа мҩаԥысит. Аҭыԥантәи адепутатрахь иқәгылан ҩыџьа акандидатцәа - Енвер Чамагәуеи Аслан Џьопуеи. Алхрақәа азгәаҭан ақалақьтә алхырҭатә ҭыԥ аҟынтәи депутатс иҟаз Нарсоу Салаҟаиа Аԥсны Жәлар Реизарахь депутатс дахьалырхыз азы.

Аԥсны ақыҭақәеи ақалақьқәеи акодқәа рырҭеит. Аҳәынҭқарра астатистикатә еилакы аизга "Аԥсны Аҳәынҭқарра административтә –дгьылҵакырала ашашьа" еиқәнаршәеит.

Аҭыжьымҭа аус еиҭадулоуп, 1992 шықәса инаркны иахьатәи аамҭанӡа Аԥсны анхарҭа ҭыԥқәа рыхьӡқәа аиҭакрақәа зегьы рыла ихарҭәаауп.

Иементәи ареспублика Аԥсни иареи рхьыԥшымрақәа еицазхарҵарц, адипломатиатә еизыҟазаашьақәа рыбжьарҵарц ажәалагала ҟанаҵеит.

"Ҳара Иемен даара ҳазҿлымҳауп. Аха уа уажәы аҭагылазаашьа уадаҩуп, аграждантә еибашьра цоит уҳәар ҟалоит. Хымԥада, ҳара ҳацклаԥшлоит уа ахҭысқәа шцало. Аҭагылазаашьа ҭышәынтәаланы, аҭынч ԥсҭазаара шьақәгылап ҳәа агәыӷра ҳамоуп, уи ашьҭахь адипломатиатә еизыҟазаашьақәа рышьақәыргыларазы ашьаҭа ҳкып", - ҳәа Иемен иҟанаҵаз аҳәамҭа ахҳәаа аиҭеит Хәытаба.

Аҟәа араион ахадара ақыҭанхамҩа арҿиара иазырхоу ахықәкытә программа аусура иаланаргоит.

Агрант аиуразы иқәыргылахо апроект азкызар ауеит:

Ари апрограмма алахәхаразы Аҟәа араион анхацәа арзаҳали апроект иаазыркьаҿу ахҳәааи наргароуп араион ахадарахь ԥхынгәы 18 рҟынӡа, акыршықәсатәи аҵиаақәа рааӡара акәзар ргәы иҭоу, мамзаргьы жьҭаара 1 аҟынӡа, акәтааӡарҭа ма ачааӡарҭа аиҿкаара ргәы иҭазар. 2021 шықәса рзы араион аҿы қәҿиарала аиԥш зеиԥшу апрограмма нарыгӡеит.

Аҟәа аӡазы ахә 100% рыла ишьҭырхыр ҟалоит. Уи амзызқәа иреиуоуп афымцалашаразы ахә ахьышьҭыҵуа азы. Аҟәатәи "Аӡыканал" аҿы иахәҭоу адокументқәа реиқәыршәара иаҿуп ақалақьтә еизарахь ашьақәырӷәӷәаразы инарышьҭразы.

Уажәазы Аҟәа аԥхьаӡагақәа ззықәгылам мызкахь 40 мааҭ ршәоит аӡәы изы. Анаплакқәеи аҳәынҭқарратә усбарҭақәеи аԥхьаӡагала 4 мааҭк кубометрак азы. Убри аан ахазхаҿқәа рахьтә 20-25% роуп аӡы ахә ахызшәаауа.

2022 шықәса хәажәкырамза аахыс Аԥсны анаплакқәа 4,5 миллион мааҭ инареиҳаны рыхә ауал рылгоуп. Аԥсны апрокуратура хада АУН "Амшынеиқәафымцамч" аҿаԥхьа ауал зқәу анаплакқәа ишыршәо азы изаамҭанытәим агәаҭарақәа рымҩаԥгара иалагеит ааԥынра алагамҭазы.

Анаплак маҷқәа рнапхгаҩцәеи хаҭалатәи анаплакҩцәеи руал ршәарц азы агәаҽанызаара рыҭан.