АҞӘА, лаҵарамза 12– Sputnik, Роберт Џьапуа. Раԥхьатәи анаука-практикатә конференциа "Ахәыҷтәы неврологиа актуалтә зҵаарақәа" иатема хаданы иҟоуп ахәыҷы игәы бзианы иира атема. Аконференциа аатит Аҟәа, лаҵарамза 12 рзы.
Урыстәыла ахәыҷтәы реабилитолог хада Татиана Батышева иазгәалҭеит:
"Ҳара иахьа ҳалацәажәараны ҳаҟоуп реиҳа ихадоу азҵаара – ахәыҷы игәы бзианы иира, иҟоу ауадаҩрақәа разыԥхьагәаҭара, заанаҵы алкаақәа рыҟаҵара".
Аконференциа иалахәуп ахәыҷчымазарақәа рзы Урыстәылатәи амилаҭтә ассоциациа аекспертцәа. Агәыҳалалратә фонд "Ашана" адиректор Џьевеира Колосова илҳәеит аконференциа аҵак ду шамоу.
"Ари апрограмма аҳәынҭқарреи икоммерциатәым аиҿкаарақәеи еицымҩаԥырго раԥхьатәи уснагӡатәуп", — лҳәеит лара.
Агәабзиарахьчара аминистр Андзор Гоов иҳәеит ахәыҷтәы неврологиа азҵаарақәа адунеи зегьы еицырзеиԥшу зҵаарақәаны иҟоуп ҳәа.
Татиана Батышева агәра ганы дыҟоуп аневрологиатә проблема змоу ахәыҷқәа рзы ихадоу ракәны ишыҟоу аҭаацәа.
"ДЦПеи егьырҭ аневрологиатә чымазарақәеи змоу ахәыҷы иҳақьым хадацәа иҭаацәа роуп. Аҭаацәа идҳарбароуп усеиԥш иҟоу ахәыҷы ишизнеитәу", лҳәеит лара.
Аконференциа аҳәаақәа ирҭагӡаны имҩаԥысуеит амастер-классқәа апедиаторцәеи ахәыҷтәы неврологцәеи рзы.
