16:10 27 Лаҵара 2020
Ишиашоу ицо аефир
  • USD71.06
  • EUR77.91
Аԥсны
Икьаҿу ахьарԥш аиура
Ҳара ҳ-Фазиль (17)
22 0 0

Рашәарамза 13 инаркны 15 рҟынӡа Аҟәа имҩаԥысраны иҟоуп Жәларбжьаратәи акультура афестиваль, Фазиль Искандер "Ауаҩы игыларҭа". Афестиваль аатит Аԥсуа драматә театр аҟны, арежиссиор Мадина Аргәынԥҳа лпремиера "Ажьақәеи амаҭқәеи" ала.

Наала Авидзба, Sputnik

Жәларбжьаратәи акультура афестиваль, Фазиль Искандер "Ауаҩы игыларҭа" Афестиваль аатит Аԥсуа драматә театр аҟны, арежиссиор Мадина Аргәынԥҳа лпремиера "Ажьақәеи амаҭқәеи" ала. Уи иџьоушьаша акакәым, избанзар сынтәа афестиваль азкуп Фазиль Искандер ирҿиамҭақәеи атеатри реиҿыбаара.

Аспектакль раԥхьаӡа акәны Мадина Аргәынԥҳа иқәлыргылеит дипломтә усумҭак аҳасабала Уфатәи адраматә театр аҟны.

Фазиль Искандер 2004 шықәса рзы, ииубилеи аан Аԥсны дыҟан. Мадина усҟан аҵара далганы Аԥсны аус луан. Раԥхьатәи лыспектакльгьы "Ажьақәеи амаҭқәеи" акәын. Фазиль Абдул-иԥа дахәаԥшит аспектакль. Азал ҭәын. Иара асценахь дыҩхалан арежиссиор шәаалыԥхь иҳәеит. Усҟан ус иҳәеит: "Даара иоригиналуп. Уи аҩызагьы аҭыԥ амазароуп" ҳәа.

Рашәарамза 13 рзы Мадина ахәаԥшыҩ изцәырылгаз аспектакль акәзар атрактовка ҿыц амоуп.

Иҟоуп Искандер ирҿиамҭақәа атеатри асценеи ирықәшәом ҳәа ирыхәаԥшуа, аха Мадина усеиԥш илшьом.

Мадина илҳәоит: "Сгәы иаанагоит адунеитә литератураҟны "Ажьақәеи амаҭқәеи" Библиак еиԥшуп ҳәа. Араҟа еизгоуп зегьы: аполитика, аԥсҭазаара, абзиабара, аԥсра, аҭира, ахәшьадра. Аиҳаракгьы сара сгәаанагарала – агәыӷра. Ҳара ҳаԥсҭазаароуп иаанарԥшуа. Асеиԥш ҟалар алшоит аҳәынҭқарра ду аҟынгьы аҭаацәара маҷ аҟынгьы. Иара ҳара зегьы иҳазкуп. Сара сҽазысшәоит аламыс закәу аиҭаҳәара, уи зцәыӡыз ауаҩы, аха изырхынҳәырц иашьҭоу ихьуа".

Атеатртә режиссура иуадаҩу занааҭуп, аха Мадина уи бзиа илбоит.

"Атеатр аҟны аусуратә процессҵәҟьа цоит. Акырҵуан асеиԥш ҳхы-ҳаԥсы адҵаны аус ҳамуижьҭеи. Актиорцәа зегьы аусура иадыԥхьалоуп", — лҳәоит арежиссиор.

Асахьаҭыхыҩ-ақәыргылаҩ Алексеи Шервашиӡе-Чачба иҳәоит:

"Фазиль Абдул-иԥа ақәҿиарақәа ҳзеиӷьеишьеит. Ишыздыруа ала даара дазыԥшуп арантәи инаҳашьҭуа аҭыхымҭақәа, ҳара ҳакәзар урҭ рзы игәаанагарақәа даара ҳарзыԥшуп".

Алексе Шервашиӡе-Чачба ҵыԥхеиԥш сынтәагьы афестиваль кураторс дамоуп.

"Алексеи– дуаҩ дууп сҳәоит. Ҳара зегьы апатриотизмра ҳалацәажәоит, аха сара сзы апатриотизмра Алексеи иҟаиҵо ауп. Аибашьраан Москвантәи дааны деибашьуан. Нас уахь дхынҳәны Аԥсны иқәиргылоит "Ажьақәеи амаҭқәеи", "Акәымжәыуаа", — лҳәоит Мадина Аргәынԥҳа.

Аҟазараҭҵааҩ Светлана Қәарсаииаԥҳа ақәыргыламҭа ахә ҳаракны илшьеит.

"Сара аспектакль даара исгәаԥхеит. Актиорцәа рыхәмарра акәзар, саргәырӷьеит. Атекст акәзар оумашәа иманшәаланы еиҭагоуп. Искандер аԥсышәала еиҳагьы ибзианы деилукаауеит", — лҳәеит лара.

Сара сҽазысшәоит ахәаԥшыҩ иибо еиликаарц. Еиҳаракгьы аповест иамыԥхьац. Аӡәы ак џьеишьандаз ҳәа сыҟаӡам. Аспектакль ахәаԥшыҩцәа ирбараны еиҭаҟоуп рашәарамза анҵәамҭеи ԥхынгәымзеи рызгьы лҳәеит Аргәынԥҳа.

Атемақәа:
Ҳара ҳ-Фазиль (17)

Ихадоу атемақәа