АҞӘА, лаҵарамза 9 – Sputnik, Роберт Џьопуа. Аџьынџьтәылатә еибашьра Дуӡӡа Аиааира амшныҳәа иазкны Аҟәа, Амҳаџьырқәа рыԥшаҳәаҟны, Идырым Асолдаҭ ибаҟа аҿаԥхьа имҩаԥысит Аиааира Апарад.
Аибашьра аветеран Илиа Ачба иҭабуп ҳәа реиҳәеит рыдныҳәалара иааиз зегьы.
"Иҭабуп ҳәа шәасҳәоит еиҿышәкааз апарад азы. Иҭабуп ҳәа шәасҳәоит ҳахьышәхамшҭуа. Аԥсны иқәынхо ажәлар зегьы ирыдысныҳәалоит Аиааира амш", — иҳәеит иара.
Аветеранцәа дрыдныҳәалеит Апарламент адепутат Саид Ҳаразиа.
"Ҳветеранцәа зегьы ишәыдысныҳәалоит шәымшныҳәа. Ес-ныҳәа, абри амш аҽны схәыҷқәа абрахь иаазгоит. Ҳара иаҳхашҭуам шәфырхаҵара. Иҭахаз зегьы хашҭра рықәым. Ҳара иаҳгәалашәонаҵы дара зыԥсы ҭоу рахь иҟоуп", — иҳәеит адепутат.
Апарад иалахәын 300-ҩык рҟынӡа аррамаҵзурауаа.
Аԥсны иҟоу Урыстәыла Ацҳаражәҳәаҩ Семион Григориев иҳәеит Аиааира амш еицаҳзеиԥшу ныҳәаны ишыҟоу.
Арратә парад ашььҭахь имҩасит "Ԥсра зқәым аполк". Аибашьцәа ирыхҭылҵыз рфотосахьақәа рыманы амшын аԥшаҳәаҿы иқәсит.
Идель Џьопуа арахь иаалгеит лабду иаб Алықьса Џьопуа ифотосахьа.
"Сара раԥхьаӡа акәны ари акциа сҽаласырхәит. Сабду иаб дтанкистын. Украина, Кривои Рог ақалақь аҟны дҭахеит. Сара сизыгәдууп", — лҳәоит лара.
Ахәылбыҽха амшын аԥшаҳәаҟны еиҿкаахоит аконцерт "Аибашьра ашықәсқәа рызтәи ашәақәа".
