ГАГРА, рашәара 10 — Sputnik, Саида Жьиԥҳа. Пицундатәи ауахәама аконцерттә зал аҟны имҩаԥысит, есышықәсатәи аклассикатә музыкатә фестиваль "Лира", уи еиднакылеит Аԥсны аҟазаратә школқәеи Чычба ихьӡ зху Аҟәатәи аҳәынҭқарратә музыкатә ҵараиурҭеи рҟынтә амузыкантцәа қәыԥшцәа.
Афестиваль иалагӡаны аҿарацәа инарыгӡеит еиуеиԥшым аамҭақәа ирыҵаркуа, еицырдыруа аԥсуеи аҳәаанырцәтәии акомпозиторцәа рырҿиамҭақәа. Аҿарацәа иадырҳәеит еиуеиԥшым амузыкатә инструментқәа.
"Сара саныхәыҷыз инаркны бзиа избон аклассикатә музыка. Уажәшьҭа хышықәса ҵуеит Пицундатәи амузыкатә школ ахь сныҟәоижьҭеи. Иахьа, афортепиано аҿы инасыгӡеит Лемуан ирҿиамҭа "Етиуд". Ари апроект алахәра даара акраҵанакуеит ахәыҷқәа ҳзы. Амузыкантцәа қәыԥшцәа иаҳнаҭоит алшара, ҳҟазара аарԥшразы", — ҳәа азгәалҭеит, афестиваль иалахәыз, Аԥсны Жәлар рартист Оҭар Хәынҵариа ихьӡ зху, Пицундатәи амузыкатә школ 3-тәи акласс аҵаҩы Деиа Ҭырқьԥҳа.
Артистцәа қәыԥшцәа рықәгыларақәа ахәаԥшцәа ирыдыркылон имеихсыӷьуаз напеинҟьарыла.
Аклассикатә музыка афестиваль "Лира" амҩаԥгара лаԥшьгамҭоуп Гагратәи аҟазаратә школ арҵаҩы Мери Ҷанба, Гагра араион акультура аҟәша аиҳабы Ҭенгьыз Габуниа ицхыраарала.
Раԥхьатәи афестиваль "Лира" мҩаԥысит 15 шықәса раԥхьа, 2002 шықәсазы.
"15 шықәса иалагӡаны, рҟазареи рбаҩхатәреи ҳдырбеит шәҩыла ахәыҷқәа. Ҳаԥхьаҟа, ҳара иаҳгәиҭоуп афестиваль амҽхак арҭбаара, ижәларбжьаратәины аҟаҵара. Ари аусмҩаԥгатә иабзоураны Аԥсны аҟазаратә школқәа рылҵшәақәа еихыршьаалоит", — лҳәеит, афестиваль "Лира" аира зыбзоуроу Мери Ҷанԥҳа.
Аклассикатә музыкатә фестиваль "Лира" хықәкы хадас иамоуп, аҟазареи абаҩхатәреи злоу ахьыбҿар ралԥшаара, анаҩс адгылара рыҭара.
