07:31 28 Цәыббра 2021
Ишиашоу ицо аефир
  • USD72.66
  • EUR85.04
Аԥсны
Икьаҿу ахьарԥш аиура
4110

Ателеканал "Абаза-ТВ" иахьа, рашәара 26 рзы аиубилеи азгәанаҭоит. Ари амш азы жәашықәса раԥхьа ателеканал аефир ахь ицәырҵит.

АҞӘА, рашәара 26 – Sputnik, Бадраҟ Аҩӡба. Иахьеиԥш исгәалашәоит "Абаза-ТВ" раԥхьатәи аефир, лҳәеит аа-шықәса ателеканал аҟны аус зуаз, Дырмит Гәлиа иҩны-амузеи аиҳабы Светлана Корсаиаԥҳа.

"Рашәара 26 рзы раԥхьаӡакәны ахәылбыҽха аефир анҭыҵуаз, ҳазегь ҳҭаҷкәымқәа кны ҳгылан, даара ҳгәы хыҭ-хыҭуан. Аиаша ҳҳәозар, усҟантәи аамҭазы ателеканал ҿыц ацәарҵра ззеилымкаауазгьы рацәаҩын. Џьоукы ус ргәы иаанагон, ари ахҭыс ауаа еиҟәызшо ак акәны иҟалоит, аҳәынҭқарра иаԥырхагахоит ҳәа. Аха иҟалап ателехәаԥшра аиҳабы Руслан Ҳашыг ибзоуразар, ари аканал ауаа еиҟәызшо акәымкәа, еидызкыло ак акәны иахьыҟалаз", — ацылҵеит уи.

"Абаза-ТВ" ацәырҵра, Аԥсуа телехәаԥшра аусурагьы ианыԥшит, азгәалҭеит Корсаиаԥҳа.

"Избанзар арҿиаратә еицлабра аныҟоу, уаргьы иуҭаххоит еиҳау, мамзаргьы уара утәала ак аҟаҵара. Абри даара акрызҵазкуа усны иҟалеит. Ари ҭоурыхтә хҭысуп, избанзар Аԥсны раԥхьаӡа акәны ахатәы телехәаԥшра аартхеит. Сгәы иаанагоит аамҭақәа царгьы абри ахҭыс аҭоурых аҟны иаанхоит ҳәа", — лҳәеит Корсаиаԥҳа.

Ателеканал "Абаза-ТВ" аусура ианалага инаркны, аԥсуа редакциа ахадас дҟаҵан Светлана Корсаиаԥҳа.

"Руслан Ҳашыги сареи Аԥсуа телехәаԥшраҿы жәашықәса инарзынаԥшуа аус еицаҳаухьан. Сара атележурналистика ашҟа сиасит аибашьра аналага, раԥхьа арадиожурналистика, нас 1994 шықәсазы автортә программа сыманы Аԥсуа телехәаԥшрахьы сыиасит", —  лҳәеит лара.

Иҳәынҭқарратәым ателехәаԥшра аарҭра Руслан Ҳашыг еснагь гәҭакыс иман, азгәалҭеит Светлана Корсаиаԥҳа.

"2007 шықәсазы ҳалагеит аусура, аха аефир ахь аҭыҵра ҳалагаанӡа, шықәсыбжак инеиҳаны аус аауан. Иахьеиԥш исгәалашәоит проектк мҩаԥаагон аԥсуа сахьаҭыхыҩцәа ирызку аочеркқәа ҟаҳҵон, урҭ акык-ҩбак аефир ашҟагьы ицәырҵит", — ацылҵеит уи.

Светала Корсаиаԥҳа лыбзоурала, ес-мҽыша иҭыҵуа иалагеит адырраҭара "Амчыбжь агәеисыбжь". Уи иазгәалҭеит, ателехәаԥшра аихьӡарақәа зегь раԥхьа иргыланы изыбзоуроу уи аиҳабы Руслан Ҳашыг шиакәу.

"Исымаз анапхгаҩцәа зегьы дрылскаауеит Руслан Мкан-иԥа, избан акәзар, анапхгара даара акраҭахуп. Уи адырра мацарагьы азхаӡом, уи абаҩхатәра мацарагьы азхаӡом, ауаҩы илшарц азы аус ахырхарҭа ааидкыланы ибозар ауп", — лҳәеит Корсаиаԥҳа.

Уи иазгәалҭеит ателехәаԥшра ҿыц ацәырҵра ажәлар ибзианы ишрыдыркылаз, иҭыҵуаз адырраҭарақәа азҿлымҳара шрымаз, иахьагьы ишрымоу. Светлана Корсаиаԥҳа "Абаза-ТВ" аколлектив русураҿы аманшәалара рзеиӷьалшьеит.

Ихадоу атемақәа