АҞӘА, мшаԥы 24– Sputnik, Бадри Есиава. Афестиваль "Абиблиоҵхы" азырхоуп ауааԥсыра ашәҟәы радыԥхьалара. Ҩынтәуп имҩаԥысуеижьҭеи Иван Папасқьыр ихьӡ зху Амилаҭтә библиотекаҿ.
Абиблиотека аихагылақәа рҟны иаартын еиуеиԥшым атемақәа ирызку ацәыргақәҵақәа.
Актәи аихагылаҿ ахәыҷқәеи адуқәеи ирыдгалан еиуеиԥшым авторцәа рырҿиамҭақәа. Ацәыргақәҵа иахьӡҵан "Алакәқәа рымаӡа".
"Ари ацәыргақәҵазы еидкылан абиблиотека афонд аҟынтәи иреиӷьӡақәоу алакәқәа. Ара ирацәоуп атәым бызшәақәа рҟынтәи аԥсшәахь еиҭагоу алакәқәагьы", — лҳәоит абиблиотека абонементтә ҟәша аиҳабы Диана Гәлиаԥҳа.
Аҩбатәи аихагылаҿ ицәыргақәҵан "Аԥсуа иашҭа", иара убасгьы аԥошьҭатә маркақәа. Амаркақәа руак аҿы Аҟәатәи аԥшьбатәи ашкол аҵаҩы Салима Ақаҩԥҳа дылдырит лабду – Вадим Ақаҩба. Иара акыршықәса инеиԥынкыланы Башкириа Аԥсны ахаҭарнакс дыҟан, иара иԥа Даур Ақаҩба иахьа Аԥсны Адәныҟатәи аусқәа рминистрс дыҟоуп.
Амаркақәа рҟынтәи аҭааҩцәа ирыхәаԥшуан Аԥсны еицырдыруа ауаа: Владислава Арӡынба, Сергеи Багаԥшь, Сулҭан Сосналиев уҳәа егьырҭгьы.
Абиблиотека дырԥшӡон Анзор Агәмаа иархив иатәу Аҟәа ажәытә сахьақәа.
Абиблиотека азалқәа руак аҿы аҟәатәи ашколқәа рҵаҩцәа идырбан Лиана Ебжьноуԥҳа ааигәа иҭылхыз афильм "Максим Горький. Абхазские очерки".
Раԥхьаӡа акәны Аԥсны "Абиблиоҵхы" мҩаԥган 2017 шықәса лаҵарамзазы.
