АҞӘА, рашәара 13 – Sputnik, Бадраҟ Аҩӡба. Аҳҭнықалақь апаркқәеи ареспубликатә трассеи рыриаҵәара апроект аус адулара мҩаԥысуеит иҳәеит Sputnik аинтервиу азҭаз Аекологиеи аԥсабара ахьчареи рзы Аҳәынҭқарратә еилакы ахантәаҩы Савели Ҷыҭанаа.
"Ари азҵаара ӡбатәызижьҭеи акрааҵуан. Аԥсны игылоуп апринц Ольденбургски иаамҭаз еиҭарҳаз аҵлақәа, асовет аамҭақәа рзы еиҭарҳаз", — иҳәеит иара.
Ҷыҭанаа иажәақәа рыла Аҟәа акрааҵуан адекоративтә ҵиаақәа реиҭаҳара аҭахны иҟаижьҭеи.
"Уажәазы ариаҵәара аплан ыҟаны иҟаӡам. Аԥыза-министр сиҿцәажәар сҭахуп асеиԥш анапынҵара аамҭаԥҵәак мацара иаҵанакуа иҟамларц", — иҳәеит Аекологиеи аԥсабара ахьчареи рзы Аҳәынҭқарратә еилакы ахантәаҩы Савели Ҷыҭанаа.
Иахьатәи аамҭазы ҳпаркқәа улаԥш дыргәырӷьо иҟам иҳәеит иара. Савели Ҷыҭанаа иазгәеиҭеит апитомник аԥҵара аамҭа ҳашҭагыло. Иааӡалатәуп аиҭаҳатә материал иҳәеит иара.
"Ариаҵәара аҭахуп ҳҳәоит. Аиҭаҳатә аԥшаара азҵаарагьы ықәгылоит. Аибашьра ҟалаанӡа Аботаникатә баҳча иаман ахатә питомникқәа, еиуеиԥшым аҵиаақәа рааӡарҭа. Иахьазы усеиԥш акгьы ыҟам", — иҳәеит аилак ахантәаҩы.
Апарктә зонақәа реиԥш Аԥыза-министр адҵа ҟаиҵеит ареспубликатә трасса хадагьы ариаҵәаразы.
Аԥсны Аҳәынҭқарратә еилакы ахантәаҩы Савели Ҷыҭанаа ишиҳәаз ала аҳҭнықалақь апарктә зонақәеи ареспубликатә трассеи рыриаҵәара апроект иалагоит 2019 шықәса, ааԥынразы.
