АҞӘА, нанҳәа 26 – Sputnik, Асмаҭ Ҵәыџьба. Урыстәылатәи Афедерациа Аԥсны Аҳәынҭқарра ахьыԥшымра аназханаҵаз амш аҽны ареспублика анапхгара, ауаажәларра неиит Ахьӡ-аԥша абаҟа ахьгылоуи, Аԥсны раԥхьатәи ахадацәа Владислав Арӡынбеи Сергеи Багаԥшьи анышә иахьамадоу аҭыԥқәа рахьи. Абри атәы аанацҳауеит амааҵзура Апсныпресс.
Аԥсны Ахада Рауль Ҳаџьымба Ешыра ақыҭа даҭааит Владислав Арӡынба имемориал амҵан ашәҭшьыҵәрақәа шьҭеиҵарц. Арахь дааиит иара убасгьы Аԥсны Жәлар реизара аиҳабы Валери Кәарҷиа.
"Иахьатәи амш ҳҭоурых азы акрызҵазкуа мшны иҟоуп. Урыстәыла иҟанаҵаз азхааҵара ашьҭахь Аԥсназы иаатит агәашәқәа, аҿиареи аизҳазыӷьареи рзы", — иҳәеит Ахада.
Абри ашьҭахь Џьгьарда ақыҭан имҩаԥган ашәҭшьыҵәрақәа рышьҭаҵара ацеремониеи. Сергеи Багаԥшь иаамҭазы Аԥсны ахьыԥшымра азхарҵеит Урыстәылеи Латынтәи Америка атәылақәа ҩбеи.
Урыстәылатәи аполитикатә усзуҩ Сергеи Бабурин иажәақәа рыла Аԥсны азхаҵара жәларбжьаратә политикатә хҭысны иҟалеит.
"Урыстәылатәи Афедерациа Аԥсны ахьыԥшымра аназханаҵаз амш ныҳәа дуӡӡахеит аԥсуаа реиԥш Аԥсны бзиа избоз зегьы рзы. 2008 шықәса, нанҳәамза Аԥсни Аахыҵ Уаԥстәылеи рҭоурыхмҩа еиҭанакит. Иахьатәи Аԥсны анапхгареи аԥсуа жәлари ишәзеиӷьасшьоит аизҳазыӷьареи ақәҿиареи", — иҳәеит аполитик.
Нанҳәа 26 2008 шықәса рзы Урыстәыла Ахада Дмитри Медведев ирылеиҳәеит Урыстәылатәи Афедерациа Аԥсны Аҳәынҭқарреи Аахыҵ Уаԥстәыла ареспубликеи рхьыԥшымра шазханаҵаз азы.
