АҞӘА, цәыббра 20 – Sputnik. Аԥсны ахада Рауль Ҳаџьымба аиҳабыра реилазаара ҿыц шьақәирӷәӷәеит ҳәа аанацҳауеит ареспублика ахада иофициалтә саит.
Аԥыза-министр актәи ихаҭыԥуаҩыс дҟаҵоуп Даур Аршба. Аԥыза-министр ихаҭыԥуаҩыс – Асҭамыр Қьецба, аминистрцәа реилазаара Аппарат ахантәаҩыс – Давид Сангәлиа.
Аԥыза-министр ихаҭыԥуаҩыси афинансқәа рминистрыси дҟаҵоуп Џьансыхә Нанба, аҩныҵҟатәи аусқәа рминистрс – Гарри Аршба, акультура аминистрс –Ельвира Арсалиаԥҳа, аџьеи, аусураҭареи, асоциалтә еиқәыршәареи рминистрс – Руслан Аџьба, аекономика аминистрс – Адгәыр Арӡынба, акурортқәеи атуризми рминистрс Авҭандил Гарцкьиа, арепатриациа аминистрс – Беслан Дбар.
Даур Ақаҩба ҩаԥхьа хадара азиуеит Адәныҟатәи аусқәа рминистрра, атәылахьчара аминистрра – Мераб Кьышьмариа.
Аҵареи аҭҵаарадырреи рминистрс дҟаҵоуп Адгәыр Какоба. Ашәахтәқәеи аизгақәеи рминистрс – Даур Кәырмазиа.
Лев Кәыҵниа Аԥсны АҶА напхгара аиҭалоит. Марина Ԥлиаԥҳа – аиустициа аминистрра, ақыҭанхамҩа аминистрра – Даур Ҭарба, агәабзиарахьчара аминистрра – Ҭамаз Ҵахнакьиа.
Рауль Ҳаџьымба иара убасгьы ишьақәирӷәӷәеит аҳәынҭқарратә еилакқәа рнапхгаҩцәәа.
Ҭеимыраз Кәакәасқьыр аҿартә политика аилак дахагылоит, Есфирь Маитоп – аргылареи архитектуреи реилак.
Вахтанг Ԥиԥиа аҳәынҭқарратә мазареи ахатәтәреи реилак ахантәаҩыс ихьӡ ҳәоуп, Гарри Саманба – астандартқәеи атехникатә хылаԥшреи реилак ахантәаҩыс.
Аҳәынҭқарратә бызшәатә политика ахантәаҩыс деиҭаҟаҵоуп Баҭал Хагәыш. Баграт Хәытаба аспорти абаҩрҵәыреи реилак дахантәаҩхоит.
Аҳәынҭқарратә ҳазалхратә еилакы ахантәаҩыс дыҟоуп Беслан Ҵнариа, аекологиеи аԥсабара ахьчареи реилак ахантәаҩыс – Савели Ҷыҭанаа.
Уаанӡатәи Аԥсны аԥыза-министр Геннади Гагәылиа амҩатә машәыр иахҟьаны иԥсҭазаара далҵит цәыббра 8 рзы.
Аԥсны аԥыза-министрс дҟаҵоуп Валери Бганба.
