АҞӘА, жьҭаара 8 – Sputnik. Аԥсны аҳәынҭқарратә хортә капелла ықәгылараны иҟоуп РУСДРАМ аҿы, жьҭаара 10 рзы ҳәа радио Sputnik иазеиҭалҳәеит аколлектив асахьаркыратә напхгаҩы, адирижиор Нора Џьынџьалԥҳа.
"Аконцерт азкуп аԥсуа жәлар аибашьраҿы риааира 25-шықәса ахыҵра. Ҳара ҭабуп ҳәа иаҳҳәоит Иракли Хынҭәба, аконцерт атеатр аҿы амҩаԥгара ахьҳадигалаз". — лҳәеит лара.
Нора Џьынџьалԥҳа лажәаәқа рыла, атеатр аҿы акустика бзиаӡа ыҟоуп. Уи аконцерт амҩаԥгаразы акраҵанакуеит.
"Ишыжәдыруа еиԥш ахортә капелла изныкымкәа ахы аланархәхьеит аспектакль "Игрок". Ҳара инаҳагӡон Моцарт и-"Реквием", — ҳәа еиҭалҳәоит лара.
Азыӡырыҩцәа аҳәара ҟарҵеит асолотә концерт атеатр аҿы имҩаԥаагарц.
"Аконцерт апрограмма иалоуп аурыси аԥсуеи жәлар рашәақәа, адоуҳатә музыка, аклассикцәа: Франц Шуберт, Сезар Франк, Вольфганг Моцарт, Георг Гендель рырҿиамҭақәа. Аконцерт аартхоит аԥсуа жәлар рашәала. Адоуҳатә музыкахь иаҵанакуеит: Дмитри Бортниански иитәу "Тебе Бога хвалим", Павел Чесноков иитәу "Совет превечный", — ҳәа еиҭалҳәоит Џьынџьалԥҳа.
Аԥсны аҳәынҭқарратә хортә капелла аконцерт ҟалараны иҟоуп РУСДРАМ аҿы, жьҭаара 10, асааҭ 19:00 рзы.
Аԥсны аҳәынҭқарратә хортә капелла аԥҵан 1969 шықәса рзы, еицырдыруа аԥсуа композитор Алықьса Чычба иаԥшьгарала. Еиуеиԥшым аамҭақәа рзы иара напхгара арҭон: Ражьден Гәымба, Алықьса Чычба, Вадим Судаков, Виачеслав Аиба, Нодар Ҷанба.
Аколлектив изныкымкәа иқәгылахьеит: Рига, Санкт-Петербург, Киев, Москва ақалақьқәа рҿы. Акапелла 40 шықәса инарзынаԥшуа Афон Ҿыцтәи аҳаԥаҿы аконцертқәа мҩаԥнагоит. Аиҳарак иара ақәгыларақәа мҩаԥысуеит XI ашәышықәсаан иргылаз Пицундатәи аныхабааҿы.
