АҞӘА, жәабран 15 – Sputnik, Асмаҭ Ҵәыџьԥҳа. Краснодартәи атәылаҿацә азыхиоуп Аԥсны ақыҭанхамҩа аминистрра ацхыраара анаҭарц ацитрусқәа ԥхазҭазтәуа амаҵақәа рнырҵәараҿы, уи азы ахәшәқәа шоунажьуагьы азгәеиҭеит афорум аҿы Краснодартәи атәылаҿацә агубернатор ихаҭыԥуаҩ Игор Галас.
Афорум аҿы имҩаԥысит Краснодартәи атәылаҿацә ахадара рхаҭыԥуааи Аԥсны аиҳабыра рхаҭыԥуааи реиԥылара. Аганқәа алацәажәеит 2019-2021 шықәсазтәи ахәаахәҭра-економикатә, аҭҵаарадырра-техникатә, агуманитартәи, акультуратәи усеицураз Апрограмма.
Галас игәаанагарала, иазхәыцтәны иҟоуп Аԥсны акурорттә обиектқәа аԥсшьаҩцәа рыдзыԥхьало иаку аинформациатә ҵакыра аиҿкаара.
"Шәача зыԥсы зшьо ауаа идырдырлатәуп Аԥсны иҟоу аобиектқәагьы. Уи ареспубликахь атуристцәа раара иацхраауеит. Сгәы иаанагоит мышкы ҳәа иаауа атуристгьы Аԥсназы дхәарҭоуп ҳәа", - иҳәеит иара.
Шәача, жәабран 14 рзы иаатит Урыстәылатәи аинвестициатә форум-2019. Иара мҩаԥысуеит жәабран 15 рҟынӡа. Афорум далахәуп Урыстәыла аиҳабыра рхантәаҩы Дмитри Медведев.
