Sputnik, Саида Жьиԥҳа
Еда Ҭохәсуа 25 шықәса аус луан аҳәсеи ахацәеи рзы аныҳәатә маҭәа ахьырҭиуаз адәқьан аҟны. Анаҩс, аԥшәмацәа қьырала ирымаз ахәаахәҭратә ҭыԥ аныҟәгара анрылымша, Еда аԥара ахшәааны иҿылхит. Уажәшьҭа хәышықәса ҵуеит аԥҳәызба лхатә ус даҿижьҭеи.
Адәқьан ду ҩеихагылакны иҟоуп. Араҟа аҭаацәара иалало, аныҳәатә хәылԥазқәа рахь ицо аҳәсеи ахацәеи рзы иуԥылоит хкы рацәала амаҭәа. Аха Еда Адаԥазар ақалақьи иазааигәоу ақыҭақәеи рҟны еиҳагьы лыӡбахә злардыруа аҭаца маҭәа иацу аҩычагақәа рыҟаҵара дахьазҟазоу алоуп. Уи аҿы ацхыраара лылҭоит лаҳәшьа Ҳаџьар.
"Сара снапы злаку аус даара бзиа избоит. Хымԥада, амаҭәа аҭира мацара сгәалаҟазаара шьҭнахуамызт, уи иацу аҩычага еибысымҭозҭгьы. Саҳәшьеи сареи ҳаицхырааны аҭаца лзы иҟаҳҵоит ашәҭҿаҳәарақәа, ахцәыркыгақәа, еиуеиԥшым ахаҳә ԥшӡақәеи аимхәыцқәеи рыла иҳарԥшӡоит лыҵкы, лкасы", - ҳәа еиҭалҳәоит Еда.
Аԥҳәызба лыдәқьан аҟны рхы инаркны ршьапаҟнынӡа рҽеиларҳәар рылшоит ачара ззыруа рнаҩс, урҭ рҭаацәра, рҩызцәа. Убас араҟа ирыхәҳауеит аҳамҭақәа.
Анапҟаза хәыҷы Иалса Аҭрышԥҳа: сан лаҳәшьа илҿысҵааит аԥашьа
Ари адәқьан Еда қьырала ианылга ашьҭахь, иадҵаало иалагаз аԥсуаа рхыԥхьаӡара иацлеит.
"Адаԥазари уи азааигәареи инхо сыуаажәлар рыбзоурала иахьа сусура маншәаланы ишьақәгылоуп", - ҳәа азгәалҭоит ҳџьынџьуаҩ.
Ҭохәсуаа рҭаацәаразы "рнапы хьуп" рҳәоит. Аиҳәшьцәа рашьа Олгун иакәзар, ацәгьеи, абзиеи раан аԥсуаа ачыс ҟаҵаҩыс дрымоуп.
Аԥснынтәи аделегациақәа Адаԥазар ианнеиуа, ақыҭақәа рҟны ирзеиҿыркаауа ачеиџьыка иара иоуп знапы иҵҵуа.
Ҭохәсуаа Калдахәара (Балбалы) рашҭа уанааҭало, иаразнак иудыруеит араҟа анапҟазацәа шынхо. Уахьынаԥшлак убла хыркуеит ԥшшәы рацәала аҩны-адәны зырԥшӡо ашәҭқәа, аҵиаақәа, урҭ рҭаргыларҭақәа еиҳагьы ихазыноуп, избанзар аиҳәшьцәа рнапала иҟарҵоит.
Акаҳуа ршны ианудыргалогьы, изықәгылоуи иавагылоу ашәҭқәеи убриаҟара еинаалоит, аԥшӡара еилазымгап ҳәа игәаӷьны иузыжәуам.
Шықәсык иалагӡаны, Sputnik Аԥсны "слаҵеит, срашәеит, аҽаҩра ҭазгалеит"
Ҭырқәтәыла сыҟазаара иалагӡаны, агәахәара дуӡӡа снаҭеит ҳџьынџьуаа рыбзазареи, рнапы злаку аусқәеи. Еиҳагьы сеигәырӷьеит ҿырԥшыгас иахьрымоу егьырҭ амилаҭқәагьы.
