АҞӘА, мшаԥы 15 – Sputnik, Бадраҟ Аҩӡба. "Амаҵзурауааи адепутатцәеи рхашәала, рхарџь, рмазара, амазаратә ҟазшьа змоу рҭакԥхықәра рзы" Азакәан апроект иахәаԥшраны иҟоуп аҩбатәи аԥхьарала, атәыла ахадаразы акандидатцәа рҭаҩра иалагаанӡа ҳәа иҳәеит Аԥсны Жәлар Реизара аиҳабы Валери Кәарҷиа, акоррупциа иаҿагыло азакәанԥҵара адкыларазы аԥшьгаратә гәыԥ ахаҭарнакцәа рԥылараан.
Абри атәы еиҭеиҳәеит акоррупциа иаҿагыло азакәанԥҵара адкыларазы аԥшьгаратә гәыԥ ахаҭарнак Рисмаг Аџьынџьал.
Акандидатцәа рҭаҩра иалагоит лаҵара 22 инаркны.
Ашәахьаҽны Аԥсны Жәлар Реизара – Апарламент ахыбра аҿаԥхьа еизеит атәылауаа гәыԥҩык.
Урҭ дҵаны иқәдыргылон адепутатцәа акоррупциа иаҿагыло азакәан рыдыркыларц. Аԥшьгаратә гәыԥ ахаҭарнакцәа идикылеит Аԥсны Жәлар Реизара аиҳабы Валери Кәарҷиа.
"Ҳара азакәан апроектқәа ҩба ҳамоуп: актәи - Аԥсны Ашьауӷатә закәанеидкылахь ацәгьоура хкы ҿыц, закәаншьаҭада абеиахара алагалазарц. Иара убасгьы ҳалацәажәеит актәи аԥхьарала ирыдыркылахьоу азакәан. Адекларациа аҟаҵаразы азакәан аҿы иарбоуп аминистррақәа зегьы акадртә ҟәшақәа рахь адекларациақәа нарышьҭларц. Абри аан акадртә ҟәша аиҳабы аминистр инаишьҭыз адыррақәа риашара гәеиҭоит. Ҳара иаҳҭахуп адыррақәа зегьы акадрқәа рыҟәшақәа рахь акәымкәа, ашәахтә органқәа рахь инарышьҭларц", - иҳәоит Рисмаг Аџьынџьал.
Ииашамкәа адекларациа хазырҭәааз ачынуаҩ аусура дамҵроуп ҳәа ишьоит иара.
Аԥсны Жәлар Реизара аиҳабы Валери Кәарҷиа ишиҳәаз ала, "Амаҵзурауааи адепутатцәеи рхашәала, рхарџь, рмазара, амазаратә ҟазшьа змоу рҭакԥхықәра рзы" Азакәан х-ԥхьарак рыла ирыдыркылароуп.
"Азакәан апроект аҩбатәи аԥхьараан ирыдыркылар, уи ахԥатәи аԥхьара аҭаххом. Аԥшьгаратә гәыԥ ажәа рысҭеит исылшо зегь шыҟасҵо азы акандидатцәа рҭаҩра иалагаанӡа иҳадаҳкыларц", - азгәеиҭеит Кәарҷиа.
Аҩӡба: ачынуаа рмазара ашәҟәы аҭагаларазы азакәан адкылара дырццакит ауаажәларра>>
Азакәан хықәкны иамоуп акоррупциа аҿагылареи ачынуааи урҭ рҭаацәарақәеи закәаншьаҭада рбеиахара аԥырҟәҟәаареи.
