АҞӘА, мшаԥы 27– Sputnik, Бадраҟ Аҩӡба. Аԥснытәи аҳәынҭқарратә университет астудентцәа ихадоу рыстипендиеи иназцу академиатә стипендиеи ршәагаа иацҵахоит иҳәеит Аминистрцәа Реилазаара аилатәараҿы Аминистрцәа Реилазаара Аппарат анапхгаҩы Давид Сангәлиа.
"Аԥсны Аҳәынҭқарра азакәан инақәыршәаны, урҭ аԥарақәа ареспубликатә биуџьет аҿы иазԥхьагәаҭан. Аӡбамҭа инақәыршәаны, ихадоу астипендиа зықь мааҭ ҟалоит (уаанӡа фышә мааҭ ыҟан - аред.), иназцу академиатә стипендиа 1500 мааҭ ҟалоит (уаанӡа зықьмааҭ ыҟан – аред.)", - иҳәеит Давид Сангәлиа.
Аԥснытәи аҳәынҭқарратә университет астудентцәа рыстипендиа ашьҭыхра азинмчы аиуеит лаҵара 1, 2019 шықәса инаркны.
