АҞӘА, цәыббра 1 – Sputnik. Жәларбжьаратәи афестиваль "Пицундатәи ауарӷантә хәылԥазқәа" аадыртуеит Пицунда, цәыббра 9 рзы Пицундатәи ауахәамаҿы, абри атәы арадио Sputnik иазеиҭалҳәеит Пицундатәи аконцерттә зал адиректор Гәында Агрԥҳа.
Ишаԥу еиԥш, афестиваль "Пицундатәи ауарӷантә хәылԥазқәа" аадыртуеит аԥсуа уарӷанарҳәаҩ Лука Гаделиа иконцерт ала.
Цәыббра 10 асааҭ 17:00 рзы Пицундатәи ауахәамаҿы дықәгылоит Иапониатәи ауарӷанарҳәаҩ Хероко Инуе, уи длыцыхәмаруеит асаксафонарҳәаҩ Вероника Кожухарова.
"Раԥхьаӡа акәны ҳзал аҟны асаксафони ауарӷани рыбжьы еицыҩныҩлоит. Ари аҩыза ҳзал аҟны раԥхьаӡа акәны имҩаԥысуеит. Херокои Вероникеи рдует ԥшӡоуп. Уажәы дара Урыстәыла агастрольқәа рымоуп. Ҳаргьы уи ҳхы иархәаны иааҳаԥхьеит ҳфестиваль ахь", - ҳәа азгәалҭеит Гәында Аргԥҳа.
- Цәыббра 10 асааҭ 20:00 рзы Аԥсны Зҽаԥсазтәыз артист, Пицундатәи ауахәама раԥхьатәи ауарӷанарҳәаҩ Гарри Кониаев иконцерт ҟалоит.
- Цәыббра 11 асааҭ в 17:00 дықәгылоит ауарӷанарҳәаҩ Артем Хачатуров, уи ашьҭахь асааҭ 20:00 рзы Сергеи Будкеев иқәгылара ҟалоит.
- Цәыббра 12 рконцерттә программа цәырыргоит ауарӷанарҳәаҩцәа Михаил Павалии Александр Книазеви.
- Цәыббра 13 - афестиваль аҵыхәтәантәи амш.
"Афестиваль ааиртуеит Лука Гаделиа, ихлыркәшоит Аԥсны Жәлар рартистка Марина Шамба. Цәыббра 13 асааҭ 20:00 рзы иҟалоит арҭ артистцәа зегьы злахәу агала-концерт", – лҳәеит Агрԥҳа.
Афестиваль апрограмма аклассикатә рҿиамҭақәа рыла ишьақәгылоуп, еиҳарак Бах иҩымҭақәа адырҳәалоит.
Пицундатәи ауарӷан агәаҳәара знаҭоз: Микаел Таривердиев игәалашәара амш>>
1977 шықәса инаркны 1992 шықәсанӡа Пицунда имҩаԥысуан Ауарӷантә музыка Жәларбжьаратәи афестиваль. Уи аԥшьызгаз Леонид Роизман иоуп - еицырдыруа аурыс уарӷанарҳәаҩ, Пиотр Чаиковски ихьӡ зху Москватәи аконсерваториа апрофессор. Уи ибзоурала Аԥсныи Урыстәылеи иаарго иалагеит еицырдыруа анемец фирмақәа иҭрыжьыз ауарӷанқәа. Уи афестиваль ауп уажәтәи Жәларбжьаратәи афестиваль "Пицундатәи ауарӷантә хәылԥазқәа" зхылҿиааз ҳәа иԥхьаӡоу.
Ари афестиваль мҩаԥысуеижьҭеи 15 шықәса рыҩнуҵҟа Пицундаҟа иаахьеит Урыстәыла, Германиа, Прибалтика, Украина, Ермантәыла уҳәа атәылақәа рҟынтәи еицырдыруа ауарӷанарҳәаҩцәа аӡәырҩы.
Иара убас шәаԥхьа ҟалоит:
-
Хьыбла Гьерзмааԥҳа: пицундатәи ауарӷан аблаҷыц еиԥш ихьчатәуп
