АҞӘА, ажьырныҳәа 31 - Sputnik. Атәыла ахада инапынҵақәа назыгӡо Валери Бганба Аенергетикеи, атранспорти, аимадареи рзы аҳәынҭқарратә усбарҭа анаплакқәа рнапхгаҩцәа дрыҿцәажәеит ҳәа аанацҳауеит Аминистрцәа реилазаара асаит.
Бганба аилацәажәараҿы иҳәеит анаплакқәа русура анализ мҩаԥгатәуп, рбалансқәа еиҿкаатәуп, ашәахтәи егьырҭ аусбарҭақәеи рҿаԥхьа руалқәа шәатәуп ҳәа. Уи адагьы, "хымԥада имҩаԥгатәуп аинвентаризациа иҟаҵәҟьоу рмазарақәа рышьақәыргыларазы, рматериал-техникатә база зеиԥшроу аилкааразы", - иҳәеит Бганба ҳәа аанацҳауеит асаит.
Валери Бганба инаҵшьны иазгәеиҭеит арҭ ауснагӡатәқәа ишалдыршо амилаҭтә ресурсқәа рхархәара, аҳәынҭқарра ахылаԥшра азнауларц.
Валери Бганба иара убасгьы иазгәеиҭеит Аенергетикеи, атранспорти, аимадареи рзы аҳәынҭусбарҭа анаплакқәа аекономика аухк хадақәа рҟны аԥыжәара рымазар шакәу.
Аԥсны Аенергетикеи, атранспорти, аимадареи рзы аҳәынҭусбарҭа ахатәтәраҿы иҟоуп анаплакқәа ааба: АУН "Амшынеиқәафымцамч", АЕ "Аԥсныбылтәы", АЕ "Аԥсныӷба", АУН "Аԥсныеихамҩа", АУН "В.Г. Арӡынба ихьӡ зху Жәларбжьаратәи аҳаиртә баӷәаза "Аҟәа", АУН "Аԥсныавтовокзал", АУН "Аԥсныавтомҩа".
Иара убас шәаԥхьар ҟалоит:
-
Валери Бганба аилацәажәара мҩаԥигеит
-
Аштатқәа роптимизациа шцо азы аҳасабырбақәа ҟаҵоуп
